ఆదిలాబాద్‌లో పారిశ్రామిక కారిడార్ కోసం భూసేకరణను వ్యతిరేకిస్తున్న రైతులు

ఆదిలాబాద్ జిల్లా బోరజ మండలం కొరట గ్రామ రైతులు పారిశ్రామిక కారిడార్ పేరిట భూసేకరణ చేపడుతున్నారని ఆరోపిస్తున్నారు. తమకు ఎలాంటి సమాచారం ఇవ్వకుండా ప్రభుత్వం 10 వేల ఎకరాల వరకు భూమి సేకరించే ప్రయత్నం చేస్తోందని, ఇందులో స్థానిక బీజేపీ ఎమ్మెల్యే పాయల్ శంకర్ కూడా భాగస్వామిగా ఉన్నారని రైతులు ఆరోపిస్తున్నారు.

గ్రామంలో నిర్వహించిన గ్రామసభలో రెవెన్యూ అధికారులు మార్కెట్ ధర ప్రకారం ఎకరాకు రూ.3 లక్షల నుంచి రూ.5 లక్షలు చెల్లిస్తామని చెప్పారని, అయితే ఇటీవల అమ్మకాలలో ఎకరా రూ.15-20 లక్షల వరకు పలికిందని రైతు సాయి తెలిపారు. భూమి కోల్పోయే ప్రతి ఒక్క రైతు కుటుంబానికి ఒక ఉద్యోగం, ఉద్యోగ భద్రత కల్పించాలని మరో రైతు డిమాండ్ చేశారు.

ఇంతకుముందు చెనకాక కోట ప్రాజెక్టు కోసం భూములు ఇచ్చినా ఇప్పటికీ సాగునీరు అందలేదని, ఇప్పుడు మళ్లీ ఇండస్ట్రియల్ కారిడార్ పేరుతో భూములు తీసుకుంటే తమ భవిష్యత్తు ప్రశ్నార్థకమవుతుందని రైతులు ఆందోళన వ్యక్తం చేశారు. పాత పరిశ్రమలైన సిమెంట్ కార్పొరేషన్ ఆఫ్ ఇండియా (సీసీఐ)ను పునరుద్ధరించడం వంటి ప్రత్యామ్నాయాలు అమలు చేయవచ్చని, కేవలం భూముల లావాదేవీలే లక్ష్యంగా ఉన్నట్లు భావిస్తున్నామని వారు వ్యాఖ్యానించారు.

స్థానిక బీజేపీ ఎమ్మెల్యే పాయల్ శంకర్, కాంగ్రెస్ నాయకులు కలిసి భూముల సేకరణకు కుట్ర పన్నుతున్నారనే ఆరోపణలు రైతులు చేస్తున్నారు. అయితే ఈ విషయంపై ప్రభుత్వం లేదా ఎమ్మెల్యే స్పందన ఇంకా లభించలేదు. తమ డిమాండ్లు రాతపూర్వకంగా హామీ ఇవ్వని పక్షంలో ఉద్యమాలు చేపడతామని రైతులు హెచ్చరించారు.