కరీంనగర్ జిల్లా మానకొండూర్‌లో ప్రజావాణి: ప్రతి సోమవారం 10 నుంచి 1 వరకు

కరీంనగర్ జిల్లా మానకొండూర్ నియోజకవర్గంలో మండల స్థాయి ప్రజావాణి కార్యక్రమం ప్రారంభమైంది. మానకొండూర్, గన్నేర్వరం, తిమ్మాపూర్ మండల పరిషత్ కార్యాలయాల్లో అధికారులు ప్రజల నుంచి దరఖాస్తులు స్వీకరిస్తున్నారు.

ఈ కార్యక్రమం ప్రతి సోమవారం ఉదయం 10 గంటల నుంచి మధ్యాహ్నం 1 గంట వరకు నిర్వహిస్తారు. రాష్ట్ర ప్రభుత్వ ఆదేశాల మేరకు సమస్యలను మండల స్థాయిలోనే పరిష్కరించేందుకు అధికారులు చర్యలు తీసుకున్నారు.

మండలంలోని 24 శాఖల అధికారులు ఈ కార్యక్రమంలో పాల్గొంటున్నారు. వీలైనంత వరకు అక్కడికక్కడే సమస్యలను పరిష్కరిస్తారు. ప్రతి దరఖాస్తును ఆన్‌లైన్‌లో నమోదు చేసి రాష్ట్ర అధికారిక పోర్టల్‌లో భద్రపరుస్తారు. ఈ వివరాలు పబ్లిక్ డొమైన్‌లో ఉంటాయి. మండలం నుంచి రాష్ట్ర స్థాయి వరకు మానిటరింగ్ ఉంటుంది.

కార్యక్రమానికి వచ్చిన ఓ మహిళ ఇంటి కోసం ప్రజా పాలనలో దరఖాస్తు చేశారు. విచారణలో తన పేరు L0 జాబితాలో ఉందని అధికారులు తెలిపారు. L1 జాబితాలో ఉంటేనే ఇల్లు వస్తుందని చెప్పారని ఆమె పేర్కొన్నారు.

తాము 25 ఏళ్లుగా అద్దె ఇంట్లో ఉంటున్నామని, తమకు ఇల్లు మంజూరు చేయాలని ఆమె ముఖ్యమంత్రి, జిల్లా మంత్రి పొన్నం ప్రభాకర్‌ను కోరారు.