బుల్లెట్ ట్రైన్ భూసేకరణ: బహదూర్గూడలో రైతుల దీక్షా శిబిరం పోలీసులు తొలగించారు

రంగారెడ్డి జిల్లా శంషాబాద్ మండలం బహదూర్గూడ గ్రామంలో బుల్లెట్ ట్రైన్ ప్రాజెక్ట్ భూసేకరణపై రైతులు నిరసన చేపట్టారు. ముంబై-హైదరాబాద్ బుల్లెట్ రైలు ప్రతిపాదన కోసం 650 ఎకరాల భూమిని సేకరించాలని ప్రభుత్వం యోచిస్తుండటంతో రైతులు ఆందోళనకు దిగారు.

నిన్న రైతులు, పోలీసుల మధ్య ఘర్షణ జరిగింది. కొందరు రైతులు పోలీసుల కళ్లలో కారం చల్లారు. నేడు పోలీసులు రైతుల దీక్షా శిబిరం టెంటును తొలగించారు. గ్రామంలో విద్యుత్ సరఫరాను నిలిపివేశారు. గ్రామ చుట్టూ చెక్‌పోస్టులు ఏర్పాటు చేసి భారీ పోలీస్ బందోబస్తును నిర్వహిస్తున్నారు. ఇతర ప్రాంతాల నుంచి ఎవరూ గ్రామంలోకి ప్రవేశించకుండా పటిష్టమైన చర్యలు తీసుకున్నారు.

రైతుల డిమాండ్లు భిన్నంగా ఉన్నాయి. భూమికి బదులు భూమి ఇవ్వాలని కొందరు, ఓపెన్ మార్కెట్ రేటు ప్రకారం పరిహారం చెల్లించాలని మరికొందరు కోరుతున్నారు. భూమి ఇచ్చేదే లేదని కొందరు స్పష్టం చేశారు. భూమి కోల్పోతే తమ జీవనాధారం పోతుందని, వ్యవసాయం తప్ప మరో మార్గం లేదని రైతులు ఆవేదన వ్యక్తం చేస్తున్నారు.

ఈ వ్యవహారంపై ఎల్లుండి అధికారులు రైతులతో చర్చలు జరపనున్నారు. ప్రభుత్వం ఎలాంటి ప్రతిపాదన చేస్తుంది, రైతులు తమ డిమాండ్లపై వెనక్కి తగ్గుతారా అనేది వేచి చూడాల్సి ఉంది. ప్రస్తుతం గ్రామంలో ఉద్రిక్త వాతావరణం కొనసాగుతోంది.