FCRA సవరణ బిల్లు 2026: కేంద్రం తాజా ప్రతిపాదనలు, విపక్షాల అభ్యంతరాలు

కేంద్ర ప్రభుత్వం విదేశీ విరాళాల నియంత్రణ చట్టం (FCRA) లో సవరణలు తీసుకురావడానికి సిద్ధమైంది. మార్చి 25న పార్లమెంటులో ప్రవేశపెట్టిన ఈ సవరణ బిల్లుపై విపక్షాలు తీవ్ర అభ్యంతరం తెలపడంతో కేంద్రం వెనక్కి తగ్గింది. తాజాగా ఈ బిల్లును మరోసారి సభ ముందు ప్రవేశపెట్టే అవకాశం ఉంది.

విదేశీ నిధులు స్వీకరించే ఎన్జీఓలు, ట్రస్టులు, విద్యా సంస్థల కార్యకలాపాల్లో పారదర్శకత పెంచడమే లక్ష్యంగా ఇందులో మార్పులు చేస్తున్నట్లు కేంద్రం తెలిపింది. ప్రస్తుతం FCRA కింద 16,000 సంస్థలు నమోదై ఉండగా, వీటికి ఏటా 22,000 కోట్ల రూపాయల విదేశీ విరాళాలు అందుతున్నాయి.

అయితే ఈ సవరణలు ప్రమాదకరమని, ఎన్జీఓలు, చర్చిలు, ట్రస్టులకు విదేశీ విరాళాలు పూర్తిగా ఆగిపోయే ప్రమాదముందని కాంగ్రెస్ సహా విపక్ష పార్టీలు ఆందోళన వ్యక్తం చేస్తున్నాయి. మత మార్పిళ్లు, స్వలాభం కోసం విదేశీ నిధులు వినియోగించే సంస్థలకు మాత్రమే ఈ బిల్లు ఇబ్బంది కలిగిస్తుందని కేంద్రం కౌంటర్ ఇస్తోంది.

బిల్లులో విదేశీ నిధుల నియంత్రణకు ఒక ప్రత్యేక అధికార సంస్థను ఏర్పాటు చేయాలని, FCRA రిజిస్ట్రేషన్ రద్దైన సంస్థల ఆస్తుల నిర్వహణ ఆ అథారిటీకి అప్పగించాలని ప్రతిపాదించారు. దీంతో కేంద్రానికి మరింత అధికారాలు వస్తాయని విపక్షాలు ఆరోపిస్తున్నాయి.

అలాగే అయోధ్య రామాలయంలో విరాళాల దుర్వినియోగం, బంగారు ఆభరణాల గైర్హాజరీపై కేంద్రం మౌనంగా ఉందని, ముందు ఆ అంశంపై చర్చ జరపాలని కాంగ్రెస్ డిమాండ్ చేసింది. ఇప్పటికే పలు బిల్లులను మెజారిటీతో పాస్ చేయించుకున్న కేంద్రం, ఈ బిల్లును కూడా అదే విధంగా పాస్ చేయించుకునే అవకాశం ఉంది.