FCRA సవరణ బిల్లు 2026: క్రైస్తవ సంఘాల ఆందోళన, అమిత్ షా హామీ

పార్లమెంటులో విదేశీ విరాళాల నియంత్రణ చట్ట సవరణ బిల్లు 2026 పై చర్చ జరగనుంది. ఈ బిల్లును ఈ ఏడాది మార్చి 25న లోక్‌సభలో ప్రవేశపెట్టారు. ఎఫ్‌సీఆర్‌ఏ నిబంధనలు ఉల్లంఘించి లైసెన్స్ కోల్పోయిన లేదా సరెండర్ చేసిన స్వచ్ఛంద సంస్థల (ఎన్జీఓ) ఆస్తులను స్వాధీనం చేసుకునేందుకు ప్రత్యేక అథారిటీ ఏర్పాటుకు ఈ బిల్లు ప్రతిపాదిస్తోంది.

ఈ నేపథ్యంలో, క్రైస్తవ మైనారిటీ సంఘాలు ఆందోళన వ్యక్తం చేశాయి. మిజోరాం ముఖ్యమంత్రి లాల్ దహోమా, మిజోరం కౌన్సిల్ ఆఫ్ చర్చెస్ ప్రతినిధులు కేంద్ర హోం మంత్రి అమిత్ షాను కలిశారు. దశాబ్దాలుగా కష్టపడి నిర్మించిన పాఠశాలలు, ఆసుపత్రులు, అనాథాశ్రమాలను ప్రభుత్వం స్వాధీనం చేసుకుంటే సేవా కార్యక్రమాలకు అంతరాయం కలుగుతుందని వారు వివరించారు. చట్టాన్ని అమల్లోకి వచ్చిన తేదీ నుంచే వర్తింపజేయాలని, పాత తేదీల నుంచి కాదని కోరారు. దీనికి స్పందించిన అమిత్ షా, బిల్లును గత తేదీల నుంచి అమలు చేయబోమని హామీ ఇచ్చారు. ఈ నెల 12న పార్లమెంట్ ఉభయ సభల్లో ఈ బిల్లుపై చర్చించనున్నట్లు వెల్లడించారు.

డీఎంకే ఎంపీ పి. విల్సన్ నేతృత్వంలోని మైనారిటీ జాయింట్ యాక్షన్ ఫోరమ్ బృందం కూడా అమిత్ షాను కలిసి తమ అభ్యంతరాలు తెలిపింది. ప్రజలకు సేవలు అందిస్తున్న సంస్థలపై ఈ బిల్లు తీవ్ర ప్రభావం చూపుతుందని ఆందోళన వ్యక్తం చేసింది. బిల్లు ఉపసంహరించుకోవాలని లేదా జాయింట్ పార్లమెంటరీ కమిటీకి సూచించాలని డిమాండ్ చేశారు. కాథలిక్ బిషప్స్ కాన్ఫరెన్స్ ఆఫ్ ఇండియా కూడా ఇదే విధమైన అభ్యంతరాలతో గత నెల 10న అమిత్ షాకు మెమోరాండం ఇచ్చింది.

కేంద్ర ప్రభుత్వం మాత్రం విదేశీ విరాళాల వినియోగంలో పారదర్శకత, జవాబుదారీతనం పెంచడం, జాతీయ భద్రతకు ముప్పు నివారించడం ఈ బిల్లు లక్ష్యమని స్పష్టం చేస్తోంది. ఆస్తుల జప్తు నిబంధనలతో సేవా కార్యక్రమాలకు విఘాతం కలుగుతుందన్న ఆందోళనలు ఎదురవుతున్నాయి.