ఎఫ్‌సీఆర్‌ఏ సవరణ బిల్లు ఉపసంహరణ లేదా జేపీసీ సమీక్ష కోరిన క్రైస్తవ నేతలు: అమిత్ షా భరోసా

కేంద్ర హోంమంత్రి అమిత్ షాను క్రైస్తవ సంఘాల ప్రతినిధులు కలిసి ఎఫ్‌సీఆర్‌ఏ సవరణ బిల్లుపై తీవ్ర అభ్యంతరాలు వ్యక్తం చేశారు. ఈ బిల్లు క్రైస్తవ సంస్థల విదేశీ నిధుల సేకరణ, నిర్వహణపై ప్రభావం చూపుతుందనే ఊహాగానాల నేపథ్యంలో ఈ భేటీ జరిగింది. మిజోరాం ముఖ్యమంత్రి లాల్దుహోమా నాయకత్వంలో క్రైస్తవ నేతలు, డీఎంకే ఎంపీ పి.విల్సన్ సారథ్యంలోని క్రైస్తవ సంస్థల ప్రతినిధి బృందం విడివిడిగా అమిత్‌షాను కలిశారు. ఈ సందర్భంగా ప్రతినిధులు బిల్లులోని అనేక నిబంధనలు రాజ్యాంగ హామీలను ఉల్లంఘిస్తాయని, చిన్న లోపాలకు సైతం రిజిస్ట్రేషన్ రద్దు, ఆస్తుల స్వాధీనం వంటి కఠిన చర్యలు తీసుకోవడం అన్యాయమని పేర్కొన్నారు. ప్రతినిధి బృందం ఎఫ్‌సీఆర్‌ఏ సవరణ బిల్లును ఉపసంహరించాలని, లేదా దానిని జాయింట్ పార్లమెంటరీ కమిటీ (జేపీసీ) సమీక్షకు పంపాలని డిమాండ్ చేస్తూ లేఖ సమర్పించింది. అదేవిధంగా ఇప్పటికే ఉన్న విదేశీ ఆస్తుల వెస్టింగ్ నిబంధనను రద్దు చేయాలని కూడా కోరింది. మిజోరాం సీఎం లాల్దుహోమా ఆరు ప్రధాన డిమాండ్లను హోంమంత్రి ముందు ఉంచారు. వాటిలో భవిష్యత్తులో అమలు, వెస్టెడ్ ఇంట్రెస్ట్‌ల రక్షణ, చిన్న లోపాలు-తీవ్ర ఉల్లంఘనల మధ్య తేడా, సరళీకృత కాంప్లయెన్స్ రూల్స్, విచారణ ప్రక్రియలో పారదర్శకత వంటివి ఉన్నాయి. అమిత్ షా ప్రతినిధులకు భరోసా కల్పిస్తూ, క్రైస్తవ సంస్థలపై ఎలాంటి అనవసర ఆంక్షలు విధించబోమని, విశ్వాస ఉల్లంఘన జరగదని హామీ ఇచ్చారు. మిగతా అంశాలను ఈ నెల 12వ తేదీన పార్లమెంటులో చర్చించనున్నట్లు తెలిపారు. డీఎంకే ఎంపీ పి.విల్సన్ మాట్లాడుతూ, బిల్లులోని క్లాజ్‌లు పూర్తిగా అనవసరమని, రిజిస్ట్రేషన్ రద్దయినా సంస్థల ఆస్తులను ప్రభుత్వం స్వాధీనం చేసుకోవడంపై తీవ్ర అసమ్మతి తెలిపారు. కాగా, ఎఫ్‌సీఆర్‌ఏ బిల్లు ఇప్పటికే లోక్‌సభలో ప్రవేశపెట్టినప్పటికీ, విపక్షాలు, పలు స్వచ్ఛంద సంస్థల నుంచి తీవ్ర వ్యతిరేకత రావడంతో ప్రభుత్వం మరింత చర్చలకు సిద్ధమైంది.