కృష్ణా జిల్లా ఎస్పీపై మహిళా హోమ్ గార్డ్ ఫిర్యాదు

పెనమలూరు పోలీస్ స్టేషన్‌కు చెందిన ఓ మహిళా హోమ్ గార్డ్ కృష్ణా జిల్లా ఎస్పీపై పోలీసులకు ఫిర్యాదు చేశారు. శిక్షగా తనను ఎస్పీ కార్యాలయానికి పంపి అక్కడ ఇంటి పనులు చేయాలని, నిరాకరించినందుకు గడ్డి పీకించారని ఆమె ఆరోపించారు.

తాను ఎస్పీని కలిసి తన ఆరోగ్య సమస్యల గురించి చెప్పగా, ‘నీకు ఉద్యోగం ఇచ్చింది స్టేషన్‌లో కూర్చోడానికి కాదు, ఇంటి పనులు చేయడానికి’ అని దురుసుగా స్పందించారని ఫిర్యాదులో పేర్కొన్నారు. భర్తను కోల్పోయి, అనారోగ్యంతో బాధపడుతున్న తనను ఎలాంటి కనికరం లేకుండా సస్పెండ్ చేశారని ఆవేదన వ్యక్తం చేశారు.

ఈ ఘటనపై ఎస్పీ స్పందన లభ్యం కాలేదు. తనకు న్యాయం చేయాలని ఆమె ప్రభుత్వాన్ని కోరుతున్నారు.