టికెట్ రేట్ల సమస్యపై ఫిల్మ్ ఛాంబర్ కొత్తగా 9 మంది సభ్యులతో ప్రత్యేక కమిటీ ఏర్పాటు

టికెట్ రేట్ల విధానంపై తెలుగు ఫిల్మ్ ఛాంబర్ కీలక నిర్ణయం తీసుకుంది. గత కమిటీని రద్దు చేసిన ఛాంబర్ కొత్తగా తొమ్మిది మంది సభ్యుల ప్రత్యేక కమిటీని ఏర్పాటు చేసింది.

సీనియర్ నిర్మాత కేఎల్ నారాయణ అధ్యక్షతన ఏర్పడిన ఈ కమిటీలో సురేష్‌బాబు, సునీల్ నారా, నాగవంశీ, చదలవాడ, భరత్ భూషణ్, ప్రసన్న కుమార్ తదితరులు సభ్యులుగా ఉన్నారు. దిల్‌రాజు, శిరీష్ లేదా మైత్రి నవీన్, రవి నుండి ఒకరు కూడా ఈ కమిటీలో సభ్యులుగా ఉంటారు.

ఇటీవల పెద్ది మా ఇంటి బంగారం, లెనిన్, చెన్నై లవ్ స్టోరీ వంటి సినిమాలు ప్రేక్షకులను థియేటర్లకు తీసుకువచ్చాయి. తద్వారా టికెట్ రేట్లు సాధారణంగా ఉంటేనే ప్రేక్షకులు భారీగా వస్తారని స్పష్టమైంది. ఈ పరిణామాల నేపథ్యంలో ఛాంబర్ కొత్త కమిటీతో టికెట్ రేట్ల సమస్యను లోతుగా విశ్లేషించి శాశ్వత పరిష్కారం దిశగా నిర్ణయం తీసుకోనుంది.

ఈ కమిటీకి ఎలాంటి సమయ పరిమితి విధించలేదు. అవసరమైనంత సమయం తీసుకుని నివేదిక ఇవ్వడానికి స్వేచ్ఛ ఇచ్చారు. ముందు ముందు బడా సినిమాలు, థియేటర్లలో ప్రేక్షకుల రద్దీని కొనసాగించాలంటే ఈ కమిటీ నిర్ణయం కీలకం కానుంది.