భారత్లో తయారైన తొలి 100% స్వదేశీ AK-203 రైఫిల్ ట్రయల్స్ విజయవంతం

ఉత్తరప్రదేశ్ లోని అమేతి కోర్వా ఫ్యాక్టరీలో తయారైన తొలి 100% స్వదేశీ AK-203 అసాల్ట్ రైఫిల్ టెస్ట్ ఫైరింగ్ విజయవంతమైంది. ఈ రైఫిల్ ను ఇండో-రష్యన్ జాయింట్ వెంచర్ రూపొందించింది.

గతంలో ఈ రైఫిళ్లలో రష్యా విడిభాగాలను వాడేవారు. ప్రస్తుతం ప్రతి భాగాన్ని భారత్లోనే తయారు చేస్తున్నారు. ముడిసరకు నుంచి చిన్న స్క్రూ వరకు భారతీయ ఎంఎస్ఎంఈలు, దేశీయ పరిశ్రమల నుంచి సేకరిస్తున్నారు. దీనివల్ల విదేశీ సరఫరాదారులపై ఆధారపడాల్సిన అవసరం తగ్గుతుంది.

AK-203 రైఫిల్ క్యాలిబర్ 7.62x39 mm. ఇది నిమిషానికి 700 రౌండ్లు ఫైర్ చేయగలదు. దీని ఎఫెక్టివ్ రేంజ్ సుమారు 800 మీటర్లు. టెలిస్కోపిక్ స్కోప్, నైట్ విజన్ కెమెరాలు అమర్చుకునే సదుపాయం ఉంది. ఇప్పటివరకు వాడుతున్న INSAS రైఫిళ్లలో జామింగ్, ఆయిల్ లీకేజీ సమస్యలు వస్తున్నాయి. వాటి స్థానంలో ఈ రైఫిల్ వాడతారు.

భారత ఆర్మీతో 6 లక్షలకు పైగా రైఫిళ్ల సరఫరాకు ఒప్పందం కుదిరింది. కోర్వా ఫ్యాక్టరీలో ప్రతి 100 సెకన్లకు ఒక రైఫిల్ ఉత్పత్తి అయ్యేలా ఉత్పత్తి లైన్ సిద్ధం చేశారు. 2030 నాటికి ఈ ఆర్డర్ పూర్తి చేయాలని లక్ష్యంగా పెట్టుకున్నారు. సెప్టెంబర్ 2026లో ఆర్మీ తుది ట్రయల్స్ నిర్వహిస్తుంది. ఆ తర్వాత ఈ రైఫిళ్లు నేరుగా సరిహద్దులోని జవాన్లకు అందుతాయి.

పాత AK-47తో పోలిస్తే AK-203 ఆధునిక 200 సిరీస్ డిజైన్ కలిగి ఉంది. దీని బరువు తక్కువ. ఫోల్డింగ్ టెలిస్కోపిక్ స్టాక్ ఉంది. పికాటినీ రైల్స్ వల్ల స్కోప్, నైట్ విజన్ పరికరాలు సులభంగా అమర్చుకోవచ్చు. రీకాయిల్ తక్కువగా ఉండడంతో లక్ష్యాన్ని ఛేదించడం మెరుగ్గా ఉంటుంది. ఈ రైఫిల్ అన్ని వాతావరణాల్లో పనిచేస్తుంది. లడఖ్ మంచు ప్రాంతాలు, రాజస్థాన్ ఎడారులు, ఈశాన్య రాష్ట్రాల అడవుల్లో కూడా దీన్ని వాడొచ్చు.