చేప ముల్లు గొంతులో ఇరుక్కుంటే అన్నం ముద్ద మింగడం ప్రమాదమని వైద్యుల హెచ్చరిక

చేపతింటున్నప్పుడు ఒక్కోసారి ముల్లు గొంతులో ఇరుక్కుపోతుంది. చాలామంది దీనికి ఇంట్లోనే చిట్కాలు పాటిస్తారు. అన్నం ముద్ద మింగడం, అరటిపండు తినడం, బలవంతంగా నీళ్లు తాగడం వంటివి చేస్తారు. కానీ ఈ పద్ధతులు ప్రమాదకరమని వైద్య నిపుణులు హెచ్చరిస్తున్నారు.

చేప ముల్లులు చాలా పదునుగా ఉంటాయి. అన్నం ముద్దతో బలంగా మింగితే, ముల్లు మరింత లోపలికి వెళ్లే అవకాశం ఉంటుంది. ఇది గొంతు గోడలను, అన్నవాహికను, కొన్ని అరుదైన సందర్భాల్లో ప్రధాన రక్తనాళాలను కూడా గాయపరచవచ్చు. పైగా, ముల్లు వెళ్లిపోయినా గీతలు పడటంతో గొంతులో ఇంకా ముల్లు ఉన్న ఫీలింగ్ రావచ్చు.

మింగేటప్పుడు తీవ్రమైన నొప్పి, ఉమ్మిలో రక్తం రావడం, శ్వాస ఇబ్బంది, ఛాతీలో నొప్పి, ఏదీ తినలేని లేదా త్రాగలేని పరిస్థితి వంటి లక్షణాలు కనిపిస్తే వెంటనే ఇఎన్టి వైద్యుడిని సంప్రదించాలి. ఆధునిక ఎండోస్కోపీ ద్వారా కొద్ది నిమిషాల్లోనే ముల్లును సురక్షితంగా తొలగించే అవకాశం ఉంది.

వైద్యులు సూచించే సురక్షితమైన చిట్కాలు: చేపలను తొందరపడకుండా, బాగా నమిలి మింగాలి. చిన్నపిల్లలు, వృద్ధులకు ముల్లు లేని ముక్కలు ఇవ్వాలి. ముల్లు గుచ్చుకుంటే చేతితో తీయడానికి ప్రయత్నించకుండా, వెంటనే నిపుణుల సహాయం తీసుకోవాలి.