పశ్చిమాసియాకు విమాన సేవలు పునరుద్ధరణ: హైదరాబాద్ నుంచి దుబాయ్, సౌదీకి తిరిగి ఫ్లైట్‌లు

పశ్చిమాసియా ప్రాంతంలో పరిస్థితులు చక్కబడడంతో భారతదేశం నుంచి మధ్యప్రాచ్య దేశాలకు విమాన సర్వీసులు పునరుద్ధరించబడుతున్నాయి. హైదరాబాద్ నుంచి దుబాయ్, సౌదీ అరేబియా తదితర ప్రాంతాలకు తిరిగి విమానాలు అందుబాటులోకి వస్తున్నాయి. ఫిబ్రవరి చివరిలో ఇరాన్ పై అమెరికా దాడుల నేపథ్యంలో ఆ ప్రాంత గగనతలం మూసివేయడంతో సర్వీసులు నిలిచిపోయాయి.

జనవరిలో 9,793 సర్వీసులు ఉండగా పాకిస్తాన్ గగనతల వినియోగంపై ఆంక్షలతో పాటు ఇరాన్ ఉద్రిక్తతల కారణంగా ఏప్రిల్ నాటికి అవి 5,552కి తగ్గాయి. ప్రస్తుతం పరిస్థితి మెరుగుపడడంతో జులై నెలకు షెడ్యూల్ చేసిన విమానాల సంఖ్య 9,474కు చేరుకుంది. ముందుగా దుబాయ్, దోహా, అబుదాబి, మస్కట్లకు సర్వీసులు తిరిగి ప్రారంభమయ్యాయి. ఈ నగరాల నుంచి అమెరికా, ఐరోపాలకు అనుసంధానం సులభంగా ఉండటంతో ఇవి కీలక కేంద్రాలుగా మారాయి.

అయితే యుద్ధ సమయంలో మౌలిక సదుపాయాలు దెబ్బతిన్న కారణంగా విమానాశ్రయాల సామర్థ్యం పూర్తి స్థాయికి చేరడానికి సమయం పట్టొచ్చని అధికారులు భావిస్తున్నారు. విశ్లేషకుల అంచనా ప్రకారం భారత్-గల్ఫ్ మార్గాల్లో ప్రయాణికుల సామర్థ్యం యుద్ధానికి ముందున్న స్థాయికి చేరడానికి ఐదు నుండి ఏడు వారాలు పట్టొచ్చు. ఒకవేళ మరోసారి ఉద్రిక్తతలు రేగకపోతే నాలుగు నుంచి ఎనిమిది వారాల్లో పూర్తి సాధారణ స్థితి చేరుకుంటుందని విశ్లేషకులు చెబుతున్నారు.