తేలియాడే సౌర విద్యుత్‌కు ఊతం: 5,000 మెగావాట్ల ‘ప్రధానమంత్రి సూర్య సరోవర్ యోజన’కు కేబినెట్ ఆమోదం

దేశంలో తేలియాడే సౌర విద్యుత్ (ఫ్లోటింగ్ సోలార్) ఉత్పత్తి సామర్థ్యాన్ని పెంచే లక్ష్యంతో కేంద్ర కేబినెట్ ‘ప్రధానమంత్రి సూర్య సరోవర్ యోజన’కు ఆమోదం తెలిపింది. రైల్వే, ఐటీ శాఖ మంత్రి అశ్వినీ వైష్ణవ్ ఈ విషయాన్ని మీడియాకు వెల్లడించారు. ప్రధాని నరేంద్ర మోదీ అధ్యక్షతన జరిగిన భేటీలో ఈ పథకానికి గ్రీన్ సిగ్నల్ లభించింది.

ఈ పథకం కింద దేశంలోని డ్యామ్‌లు, సరస్సులు, కాలువలు, పారిశ్రామిక చెరువుల వంటి జలాశయాల ఉపరితలంపై సోలార్ ప్యానెల్స్ ఏర్పాటు చేస్తారు. 5 సంవత్సరాల్లో మొత్తం 5,000 మెగావాట్ల ఫ్లోటింగ్ సోలార్ పీవీ సామర్థ్యాన్ని సృష్టించడమే లక్ష్యం. ప్రస్తుతం దేశంలో సౌర విద్యుత్ కోసం 102 గిగావాట్ల (సుమారు 1,02,000 మెగావాట్ల) పొటెన్షియల్ ఉందని మంత్రి తెలిపారు.

పథకానికి ప్రభుత్వం మెగావాట్కు రూ. కోటి చొప్పున సబ్సిడీని అందిస్తుంది. ప్రాజెక్టుల ఎంపిక టారిఫ్ ఆధారిత పోటీ బిడ్డింగ్ ద్వారా జరుగుతుంది. భూసేకరణ అవసరం ఉండదు కాబట్టి ఖర్చు గణనీయంగా తగ్గుతుంది. అలాగే నీటి ఆవిరిని తగ్గించడం, కార్బన్ డయాక్సైడ్ ఉద్గారాలను 10 మిలియన్ టన్నుల మేర నిరోధించడం వంటి ప్రయోజనాలు ఉంటాయి.

పీక్ డిమాండ్ సమయంలో విద్యుత్ సరఫరాను సాఫీగా చేయడానికి ప్రతి ప్రాజెక్టులో కనీసం రెండు గంటల ఎనర్జీ స్టోరేజీని కూడా ఈ స్కీములో చేర్చారు. ఈ కార్యక్రమం ద్వారా 16,000 నుంచి 17,000 పూర్తికాల ఉద్యోగాలు లభిస్తాయని, ఇప్పటికే సోలార్ రంగంలో దేశీయ తయారీ బాగా పెరిగిందని అశ్వినీ వైష్ణవ్ పేర్కొన్నారు.