కొడంగల్‌లో ఉచిత బ్రేక్‌ఫాస్ట్ పథకం: విద్యార్థుల సంఖ్యలో పెరుగుదల

వికారాబాద్ జిల్లా కొడంగల్ నియోజకవర్గంలో ప్రభుత్వం అమలు చేస్తున్న ఉచిత అల్పాహార పథకం ఫలితంగా ప్రభుత్వ పాఠశాలల్లో విద్యార్థుల నమోదు గణనీయంగా పెరిగిందని విద్యాశాఖ అధికారులు తెలిపారు.

గత ఏడాది కొడంగల్, దౌల్తాబాద్, బొమరాస్పేట్, దుద్యాల మండలాల్లో పైలట్ ప్రాజెక్ట్‌గా ఈ పథకాన్ని ప్రారంభించారు. ఈ ఏడాది నుండి రాష్ట్రవ్యాప్తంగా అమలు చేస్తున్నట్లు ప్రభుత్వం ప్రకటించింది. నారాయణపేట, పరిగే, తాండూరు నియోజకవర్గాలకు కూడా ఈ పథకాన్ని విస్తరించారు.

హరికృష్ణ ఫౌండేషన్ ఆధ్వర్యంలో కొడంగల్‌లోని కేంద్రీకృత వంటశాలలో అల్పాహారం తయారు చేస్తున్నారు. 690 పాఠశాలల్లో 61,740 మంది విద్యార్థులకు ఇడ్లీ, మిలేట్ ఇడ్లీ, పొంగల్, దోశ, పూరి, బోండా వంటి పదార్ధాలను అందిస్తున్నారు. వారానికి మూడు రోజులు పాలు, గుడ్లు, రాగిజావ కూడా ఇస్తున్నారు.

విద్యార్థులు మాట్లాడుతూ, గతంలో ఆకలితో బడికొచ్చి ఇబ్బంది పడేవారని, ఇప్పుడు సమయానికి టిఫిన్ లభించడంతో చదువుపై దృష్టి పెట్టగలుగుతున్నామని చెప్పారు. ఉపాధ్యాయులు కూడా హాజరు శాతం మెరుగుపడిందని, పిల్లలు తరగతులకు సకాలంలో వస్తున్నారని తెలిపారు.

కొడంగల్ మండల విద్యాధికారి రామరెడ్డి వివరించిన వివరాల ప్రకారం, ఈ పథకం ప్రారంభించాక గత సంవత్సరంతో పోలిస్తే 600 నుంచి 700 మంది అదనపు విద్యార్థులు చేరారు. ఈ ఏడాది మరో 400 మంది పెరిగే అవకాశం ఉందన్నారు. పౌష్టికాహారం అందడంతో విద్యార్థుల్లో చురుకుదనం పెరగడంతో పాటు ఐకమత్యం, సామాజిక సమతోల్యత కూడా పెంపొందుతుందని పేర్కొన్నారు.

ఈ పథకాన్ని ఉమ్మడి పాలమూరు జిల్లా అంతటా విస్తరించాలని విద్యార్థులు, తల్లిదండ్రులు కోరుతున్నారు.