E20 ఇంధనంపై గడ్కరి స్పష్టత: BS3 వాహనాల్లో చిన్నపాటి రిపేర్లు మాత్రమే

కేంద్ర రోడ్డు రవాణా మంత్రి నితిన్ గడ్కరి E20 ఇంధనం వినియోగంపై రాజ్యసభలో లిఖితపూర్వక సమాధానం ఇచ్చారు. E20 పెట్రోల్ వాడే BS3 వాహనాల్లో చిన్నపాటి రిపేర్లు; కొన్ని రబ్బరు భాగాలు, గ్యాస్కెట్లు మార్చాల్సి రావచ్చని ఆయన తెలిపారు. అయితే వాహనం పనితీరు, మన్నిక, మైలేజీపై పెద్ద ప్రభావం ఉండదని స్పష్టం చేశారు.

IOCL, IIP డెహ్రాడూన్, SIAM, ARAI సంయుక్త అధ్యయనాల ప్రకారం E20 ఇంధనం వాడే వాహనాల ఇంజన్లలో ఎలాంటి మార్పులు అవసరం లేదని గడ్కరి పేర్కొన్నారు. ఈ పరిశోధనలు సానుకూలంగా వచ్చిన తర్వాతే దశలవారీగా E20 అమలు చేసినట్లు వివరించారు.

కేంద్రం ఎంత వివరణ ఇచ్చినా, క్షేత్రస్థాయి అనుభవాలు భిన్నంగా ఉన్నాయి. లోకల్‌సర్కిల్స్ నిర్వహించిన సర్వేలో 2023కు ముందు తయారైన పెట్రోల్ కార్ల యజమానుల్లో 66% మంది 2025 ప్రారంభం నుంచి మైలేజీ 10% కంటే ఎక్కువగా తగ్గిందని తెలిపారు. 55% మంది తమ వాహనాలకు ముందు కంటే ఎక్కువ మరమతులు అవసరమవుతున్నాయని చెప్పారు.

2023 నుంచి తయారైన వాహనాల్లో మాత్రమే E20 ఇంధనానికి తగిన మెటీరియల్స్ వాడారు. దీంతో అంతకుముందు తయారైన కోట్లాది వాహనాలు ప్రత్యామ్నాయం లేకుండా తమకు పూర్తిగా అనుకూలించని ఇంధనాన్ని వాడాల్సి వస్తోంది. వాహనదారులు RC బుక్ లేదా ఫ్యూయల్ క్యాప్‌పై E20 కంపాటిబిలిటీ గుర్తును చూసుకోవాలని నిపుణులు సూచిస్తున్నారు. Maruti, Hyundai, Toyota వాహనాలు ఏప్రిల్ 2023 తర్వాత; Tata మోడళ్లు ఫిబ్రవరి 2023 తర్వాత తయారైతే ఇబ్బంది లేదు. ఆన్‌లైన్ చెకర్ టూల్స్ ద్వారా కూడా వివరాలు తెలుసుకోవచ్చు.

పాత వాహనాల యజమానులు మైలేజీ తగ్గుదల, భాగాల అరుగుదల పట్ల అప్రమత్తంగా ఉండాలని, వీలైతే ఇథనాల్ శాతం తక్కువ ఉన్న ఇంధనాన్ని వెతికి వాడటం లేదా ఫ్యూయల్ సిస్టమ్ క్రమం తప్పకుండా సర్వీసింగ్ చేయించుకోవడం మంచిదని సూచిస్తున్నారు.