గణేష్ నిమజ్జనం ప్రశాంతంగా; శనివారం ఉదయం 10:30 లోపు పూర్తి చేసేలా చర్యలు

తెలంగాణలో గణేష్ నిమజ్జనాలు ప్రశాంతంగా కొనసాగుతున్నాయని డీజీపీ సీవీ ఆనంద్ తెలిపారు. హైదరాబాద్‌లోని డీజీపీ కార్యాలయంలో శుక్రవారం నిర్వహించిన విలేకరుల సమావేశంలో నిమజ్జన ఏర్పాట్లు, పోలీసు బందోబస్తు వివరాలను వెల్లడించారు.

రాష్ట్రవ్యాప్తంగా గణేష్ పోర్టల్‌లో 1.24 లక్షల విగ్రహాలు నమోదయ్యాయని చెప్పారు. శుక్రవారం ఉదయం వరకు సుమారు 88,000 విగ్రహాల నిమజ్జనం పూర్తయిందని తెలిపారు. అపార్ట్‌మెంట్లు, ఇళ్లు, వ్యక్తిగత ప్రదేశాల్లో ఏర్పాటు చేసిన విగ్రహాలతో కలిపి రాష్ట్రంలో మొత్తం విగ్రహాల సంఖ్య 3.5 నుంచి 4 లక్షల వరకు ఉండవచ్చని అంచనా వేశారు.

హైదరాబాద్‌లో గత 10 రోజులుగా 25 వేల మందికి పైగా పోలీసులతో బందోబస్తు ఏర్పాటు చేశారు. TSSP, RAF, NDRF, OCTOPUS బలగాలతో పాటు డీజీపీ రిజర్వ్ నుంచి ఐదు కంపెనీలను అందుబాటులో ఉంచినట్టు డీజీపీ చెప్పారు. ప్రధాన నిమజ్జన ప్రాంతాలను సీసీటీవీ కెమెరాలు, కమాండ్ కంట్రోల్ కేంద్రాల ద్వారా పర్యవేక్షిస్తున్నారు. హైదరాబాద్ ఇన్‌చార్జి మంత్రి పొన్నం ప్రభాకర్, హైదరాబాద్ సీపీ, జీహెచ్ఎంసీ కమిషనర్, కలెక్టర్‌తో కలిసి ఏరియల్ సర్వే ద్వారా పరిస్థితిని సమీక్షించారు.

గణేష్ ఉత్సవాల సందర్భంగా గత 10 రోజుల్లో వివిధ ఘటనల్లో 13 మంది మృతి చెందగా, 26 మంది గాయపడినట్లు డీజీపీ వెల్లడించారు. సైబరాబాద్ పరిధిలోని పఠాన్‌చేరులో ఆరుగురు మృతి చెందారని, మల్కాజ్‌గిరిలో 17 మంది గాయపడ్డారని పేర్కొన్నారు. నిమజ్జన విధులకు హైదరాబాద్ వచ్చిన కొత్తగూడెం ఎస్ఐ వెంకన్న మృతి బాధాకరమని అన్నారు. శబ్ద కాలుష్యాన్ని తగ్గించి నిబంధనలు పాటించాలని ప్రజలకు సూచించారు.

హైదరాబాద్‌లో మిగిలిన విగ్రహాల నిమజ్జనాన్ని శనివారం ఉదయం 10:30 లోపు పూర్తి చేసేలా చర్యలు తీసుకుంటున్నట్లు డీజీపీ తెలిపారు. నిమజ్జనానికి వచ్చే విగ్రహాలను ఆలస్యం చేయకుండా పోలీసుల సూచనల మేరకు తరలించి ట్రాఫిక్ రద్దీ తగ్గించేందుకు సహకరించాలని ఆయన ప్రజలకు విజ్ఞప్తి చేశారు.