మేడ్చల్‌లో పోలీస్ స్టేషన్ పక్కనే జ్యువెలరీ షాప్‌లో చోరీ

మేడ్చల్ పోలీస్ స్టేషన్‌కు సమీపంలో ఉన్న శ్రీ జగదంబ జ్యువెలరీ షాప్‌లో దొంగలు చోరీకి పాల్పడ్డారు. షాపు వెనుక వైపు గోడకు కన్నం పెట్టి లోపలికి చొరబడ్డారని పోలీసులు తెలిపారు.

పోలీసుల ప్రాథమిక అంచనా ప్రకారం సుమారు 20 తులాల బంగారం పోయింది. 8.5 కిలోల వెండి, ₹4 లక్షల నగదు కూడా దోచుకెళ్లినట్టు తెలుస్తోంది. చోరీ సమయంలో షాపులో ఎంత సరుకు ఉందనేది పూర్తిగా లెక్కించాల్సి ఉందని అధికారులు చెప్తున్నారు.

దీపావళి సందర్భంగా ఆదివారం పూజ చేసిన తర్వాత యజమాని షాపు మూసి ఇంటికి వెళ్లారు. సోమవారం ఉదయం తలుపు పగిలి ఉండడాన్ని గమనించారు. వెండి, బంగారం, నగదుతో పాటు కస్టమర్ల వస్తువులు కూడా పోయాయని యజమాని తెలిపారు.

ఇదే షాపులో ఇంతకు ముందు కూడా ఒకసారి చోరీ జరిగినట్టు సమాచారం ఉంది. ఈ ఘటన ఒక్కరే చేశారా, గ్యాంగ్ కలిసి చేసిందా అనే కోణంలో దర్యాప్తు జరుగుతోంది. సమీపంలోని CCTV ఫుటేజ్‌ను పరిశీలిస్తున్నట్టు పోలీసులు తెలిపారు.

పోలీస్ స్టేషన్ పక్కనే చోరీ జరగడంతో సమీపంలోని వ్యాపారులు ఆందోళన వ్యక్తం చేస్తున్నారు. దొంగలను పట్టుకుని సొత్తును రికవరీ చేస్తామని పోలీసులు చెప్తున్నారు.