జెన్-జీ ఉద్యోగుల్లో 'ఎఫర్ట్ రిసెషన్' ధోరణి: 63% కంపెనీల గుర్తింపు

గ్రేట్ ప్లేస్ టు వర్క్ ఇండియా అధ్యయనం ప్రకారం, దేశంలో 63% కంపెనీలు తమ ఉద్యోగుల్లో 'ఎఫర్ట్ రిసెషన్' ధోరణిని గమనించాయి. ఉద్యోగులు పనిపై శ్రద్ధ పెట్టడం లేదని కాదు, అప్పగించిన పని పూర్తి చేస్తున్నారు. కానీ అదనపు సమయం కేటాయించడానికి, వ్యక్తిగత జీవితాన్ని త్యాగం చేయడానికి ఇష్టపడటం లేదు.

ఈ మార్పుకు ప్రధాన కారణం జన్జి (Gen Z) వేగంగా శ్రామిక శక్తిలోకి ప్రవేశించడం. 2023లో భారత శ్రామిక శక్తిలో జన్జి వాటా 13% ఉండగా, ఇప్పుడు అది 26%కి చేరింది.

జన్జి ఉద్యోగులు కేవలం జీతం, ఉద్యోగ భద్రత మాత్రమే కాకుండా వర్క్-లైఫ్ బ్యాలెన్స్, ఫ్లెక్సిబుల్ వర్కింగ్ (రిమోట్ లేదా హైబ్రిడ్), తమ పని ప్రయోజనంపై స్పష్టత, కెరీర్ గ్రోత్‌లో పారదర్శకత కోరుకుంటున్నారు. ఆఫీస్ సమయం ముగిసిన తర్వాత ల్యాప్‌టాప్ మూసేయడం తమ హక్కుగా భావిస్తున్నారు.

అయితే, ఈ మార్పును కంపెనీలు పెద్ద సవాల్‌గా ఎదుర్కొంటున్నాయి. దాదాపు ప్రతి ఇద్దరిలో ఒక హెచ్‌ఆర్ హెడ్, జన్జిని ఎలా ప్రేరేపించాలో పూర్తిగా అర్థం చేసుకోలేకపోతున్నామని అంగీకరిస్తున్నారు. నిపుణులు చెప్పేది ఏమిటంటే, ఉచిత స్నాక్స్ లేదా కఠినమైన నియమాలు సమస్యను పరిష్కరించవు. బలమైన నాయకత్వం, నమ్మకం, ఉద్యోగుల అభిప్రాయాలకు విలువ ఇవ్వడం అవసరం. ఇలాంటి వాతావరణం ఉన్న కార్యాలయాల్లో ఉత్పాదకత 47%, ఆవిష్కరణలు 34% మెరుగయ్యాయని అధ్యయనం తెలిపింది.

మరోవైపు, జన్జిని అర్థం చేసుకోవడంతో పాటు AI విస్తరణ కూడా హెచ్‌ఆర్ విభాగాలకు మరో సవాలుగా మారుతోంది. రాబోయే రోజుల్లో కంపెనీల మధ్య పోటీ కేవలం టెక్నాలజీతోనే కాకుండా, ఉద్యోగులను ఎంత బాగా అర్థం చేసుకుంటాయనేదానిపై ఆధారపడి ఉంటుంది.