నంద్యాల జిల్లా: మౌలాలి స్వామి విగ్రహానికి అలంకరించిన బంగారు గొడుగు చోరీ

నంద్యాల జిల్లా ఔకు మండలంలోని తేరు గ్రామంలో మౌలాలి స్వామి విగ్రహానికి అలంకరించిన బంగారు గొడుగును దుండగులు దోచుకెళ్లారు. మొహరం పెద్ద ఊరేగింపు సందర్భంగా భక్తుల ముసుగులో గుడిలోకి ప్రవేశించిన గుర్తుతెలియని వ్యక్తులు ఈ చోరీకి పాల్పడ్డారు.

నైలాన్ దారంతో కట్టి ఉన్న బంగారు గొడుగును బ్లేడుతో కత్తిరించి తీసుకెళ్లినట్లు స్థానికులు తెలిపారు. మౌలాలి స్వామి పీర్ల చావిడి ఉత్సవ కమిటీ ఈ ఘటనపై పోలీసులకు ఫిర్యాదు చేసింది.

పండుగ సందడిలో ఆకతాయిలు, మద్యం మత్తులో ఉన్న వ్యక్తులు ఈ నేరానికి పాల్పడి ఉండవచ్చనే అనుమానాన్ని స్థానికులు వ్యక్తం చేస్తున్నారు. పోలీసులు దర్యాప్తు ప్రారంభించారు. ఇప్పటివరకు ఎవరూ అరెస్ట్ కాలేదు.