DSC క్రీడా కోటాపై దుష్ప్రచారానికి ప్రభుత్వం చెక్ పెట్టింది - గణాంకాలతో నిజాలు వెల్లడి

DSC క్రీడా కోటాపై వ్యాపిస్తున్న దుష్ప్రచారానికి రాష్ట్ర ప్రభుత్వం గణాంకాలతో చెక్ పెట్టింది. కమ్మ సామాజిక వర్గానికి కేవలం తొమ్మిది పోస్టులు మాత్రమే దక్కాయని, అంతకంటే ఎక్కువగా కాపు మరియు రెడ్డి సామాజిక వర్గాలకు పోస్టులు లభించాయని ప్రభుత్వం స్పష్టం చేసింది.

DSC లో క్రీడల కోటా కింద మొత్తం 382 మంది అభ్యర్థులను ఎంపిక చేయగా, అందులో OC కేటగిరీ కింద 42 పోస్టులు భర్తీ చేసినట్లు ప్రభుత్వం తెలిపింది. ఆ 42 పోస్టుల్లో కమ్మ సామాజిక వర్గానికి కేవలం తొమ్మిది ఉపాధ్యాయ పోస్టులు మాత్రమే వచ్చాయని వెల్లడించింది. OC కేటగిరీలో అత్యధికంగా కాపు సామాజిక వర్గానికి 16 పోస్టులు, రెడ్డి సామాజిక వర్గానికి 10 పోస్టులు దక్కాయని తెలిపింది. వైశ్య, క్షత్రియ, బ్రాహ్మణ వర్గాలకు రెండేసి పోస్టులు చొప్పున, మైనారిటీ వర్గానికి ఒక పోస్టు లభించినట్లు ప్రభుత్వం పేర్కొంది.

రిజర్వేషన్ల వారీగా చూస్తే SC గ్రూప్ 3 కింద అత్యధికంగా 72 పోస్టులు భర్తీ కాగా, BC-D కింద 63, BC-A కింద 53, BC-B కింద 48 పోస్టులు కేటాయించారు. OC కింద 42, SC గ్రూప్ 2 కింద 38, ST కింద 29, BC-E కింద 28, BC-C కింద నాలుగు, SC గ్రూప్ 1 కింద రెండు, OC EWS కింద ఒక పోస్టు భర్తీ అయ్యాయి. కేవలం రెండు పోస్టులు మాత్రమే భర్తీ కాకుండా మిగిలిపోయాయి.

DSC పై ప్రతిపక్షం YSRCP పదే పదే కొత్త కుట్రలకు తెరతీస్తోందని ప్రభుత్వం మండిపడింది. 2014-19 మధ్యకాలంలో DSP ల ప్రమోషన్లు ఒకే కులానికి ఇచ్చారని తప్పుడు ప్రచారం చేసినట్లే, ఇప్పుడు 2025 DSC విషయంలోనూ అదే కుట్రపూరిత వ్యూహాన్ని అమలు చేస్తున్నారని ఆగ్రహం వ్యక్తం చేసింది. DSC ని అడ్డుకునేందుకు 241 కేసులు వేయించారని, ఆ తర్వాత పేపర్ లీక్ డ్రామాలు, ఫిజికల్ వెరిఫికేషన్, హారిజాంటల్ రిజర్వేషన్ల పేరిట వరుసగా అబద్ధాలు ప్రచారం చేశారని ప్రభుత్వం వివరించింది.

స్పోర్ట్స్ కోటా భర్తీలో ఎలాంటి అవకతవకలు జరగలేదని, జరిగితే నిరూపించాలని అధికారులు ఓపెన్ ఛాలెంజ్ విసిరినట్లు ప్రభుత్వం గుర్తు చేసింది. YSRCP అనుకూల మీడియా చేస్తున్న ప్రచారంలో వాస్తవం లేదని ప్రభుత్వం స్పష్టంగా పేర్కొంది.