అధిక దిగుబడి పెసర రకాలు – వానాకాలం సాగు సూచనలు

వానాకాలం పెసర సాగుకు సంబంధించి ఖమ్మం జిల్లా వైరా కృషి విజ్ఞాన కేంద్రం శాస్త్రవేత్త రంజిత రైతులకు సూచనలు అందించారు. అధిక దిగుబడి కోసం సరైన రకాలు, యాజమాన్య పద్ధతులు పాటించాలని సూచించారు.

పంట విత్తే సమయం: తెలంగాణలో తక్కువ వర్షపాత ప్రాంతాలైన ఉత్తర, దక్షిణ తెలంగాణ జిల్లాల్లో జూన్ 15 నుంచి జూలై 15 వరకు విత్తుకోవచ్చు. కృష్ణా-గోదావరి దక్షిణ మండలం, ఉత్తర కోస్తా మండలాల్లో జూన్-జూలై నెలల్లో విత్తాలి. పెసరను చవుడు, నీరు నిలిచే నేలలు మినహాయించి అన్ని రకాల భూముల్లో సాగు చేయవచ్చని రంజిత తెలిపారు.

రకాలు: మధిర రీసెర్చ్ స్టేషన్ నుంచి విడుదలైన మధిర 347, మధిర 351, వరంగల్ 37, వరంగల్ 42 (యాదాద్రి) వంటి రకాలు అనుకూలం. ముఖ్యంగా వరంగల్ 42 పల్లాకు తెగులను తట్టుకుంటుంది. విత్తన శుద్ధి: ఇమిడాక్లోప్రిడ్ (5 మి.లీ./కిలో విత్తనం)తో శుద్ధి చేసి, ఆ తర్వాత ట్రైకోడర్మా లేదా రైజోబియం బయోఫెటిలైజర్ వాడాలన్నారు.

విత్తే పద్ధతి: వానాకాలంలో ఎకరాకు 6 కిలోల విత్తనం సరిపోతుంది. సాలల్లో విత్తేటప్పుడు వరుసల మధ్య 30 సెం.మీ., మొక్కల మధ్య 10 సెం.మీ. దూరం ఉండేలా చూసుకోవాలి. విత్తిన 24-48 గంటల్లో పెండీమిథాలిన్ (1.2 లీటర్లు/ఎకరా) పిచికారీ చేస్తే మొదటి కలుపును అదుపు చేయవచ్చు. అధిక వర్షాల వల్ల అంతర్ కృషి చేయలేకపోతే హిమాజతాపై (250 మి.లీ./ఎకరా) ఉపయోగించి వెడల్పాకు, గడ్డి జాతి కలుపు నివారించవచ్చు.

చీడపీడల నివారణ: మొలక వచ్చిన 10-15 రోజుల్లో చిత్తపురుగుల నివారణకు క్లోరోపైరిఫాస్ (2.5 ml/లీటరు నీటికి) పిచికారీ చేయాలి. పూత-పిందె దశలో మారుకా మచ్చల పురుగు కనిపిస్తే క్లోరాంట్రానిలిప్రోల్ (0.6 ml/లీటరు నీటికి) వాడాలి. పల్లాకు తెగులు రాకుండా రసం పీల్చే పురుగులను ట్రైజోఫాస్, ఎసిటామిప్రిడ్ వంటి మందులతో నియంత్రించుకోవచ్చు.

నీటి యాజమాన్యం: పెసర వర్షాధార పంట అయినా, కరువు పరిస్థితుల్లో విత్తిన వెంటనే, పూత దశలో, పిందె దశలో, కాయలో గింజ నిండే సమయంలో నీటి తడులు అందించాలి. పంట కోత: 80% కాయలు తయారైన తర్వాత కోయించి, ఎండబెట్టిన తర్వాత నూర్పిడి చేసి, గింజను బాగా ఆరబెట్టాలని శాస్త్రవేత్త సూచించారు.