మోకాలి లోతు వరదనీటిలో వధువును మోసుకెళ్లిన వరుడు: ఇండోర్‌లో రియల్ మాన్సూన్ వెడ్డింగ్

మధ్యప్రదేశ్‌లోని ఇండోర్ నగరంలో భారీ వర్షం కారణంగా రోడ్లపై మోకాలి లోతు నీరు నిలిచిన సమయంలో ఓ వరుడు తన వధువును చేతుల్లో ఎత్తుకుని కల్యాణ మండపానికి తీసుకెళ్లిన ఘటన చోటు చేసుకుంది. వరుడు వైభవ్ అనే యువకుడు వర్షాన్ని లెక్కచేయకుండా వధువును ఒడిలోకి ఎత్తుకుని నడవడంతో, ఆ క్షణం స్నేహితుడి కెమెరాలో బంధించబడింది. ‘వావ్ బ్రదర్ వైభవ్, ఎవరూ దీన్ని రికార్డ్ చేయలేదు, నేనే చేశాను’ అంటూ స్నేహితుడు వీడియోలో మాట్లాడటం వినిపించింది. ఇండోర్‌లో ఇటీవల కురిసిన భారీ వర్షాలకు లోతట్టు ప్రాంతాలు జలమయమయ్యాయి. పలు కాలనీల రోడ్లు, ప్రధాన రహదారులు నీళ్లలో మునిగాయి. ఇలాంటి పరిస్థితుల్లో వివాహ వేడుకకు వెళ్తున్న జంట ఈ ఇబ్బందిని ఎదుర్కొన్నది. వధువు భారీ దుస్తులు తడవకుండా ఉండేందుకు వరుడు ఆమెను ఎత్తుకుని మోకాలి లోతు నీటిలో దూసుకెళ్లాడు. ఈ వీడియో సోషల్ మీడియాలో ఆసక్తికర సంఘటనగా మారింది. తాజాగా కురుస్తున్న మాన్సూన్ జల్లులు ఇండోర్‌తో పాటు చుట్టుపక్కల జిల్లాల్లో జనజీవనాన్ని స్తంభింపజేశాయి. ఈ దంపతులు మాత్రం వర్షాన్ని లెక్కచేయకుండా వివాహం పూర్తి చేశారు.