వేరుశనగ పంటలో కలుపు, ఎరువుల యాజమాన్యం: శాస్త్రవేత్త సూచనలు

తెలంగాణలో రబీ వేరుశనగ పంట ప్రస్తుతం 20 నుంచి 40 రోజుల దశలో ఉంది. ఈ దశలో కలుపు యాజమాన్యం, ఎరువుల యాజమాన్యం సరిగ్గా చేస్తే దిగుబడి పెరుగుతుందని శాస్త్రవేత్త విజయ్ కుమార్ తెలిపారు. నూనె గింజల పంటల్లో వేరుశనగ ప్రధాన పంట అని ఆయన చెప్పారు.

తెలంగాణలో సుమారు 2 లక్షల హెక్టార్లలో రబీ వేరుశనగ సాగవుతోంది. ఉత్తర తెలంగాణలో అక్టోబర్ 15 వరకు, దక్షిణ తెలంగాణలో నవంబర్ 15 వరకు రైతులు విత్తుకోవచ్చు. తేలిక నేలలు, ఎర్ర చిలక నేలలు ఈ పంటకు అనుకూలం. నీటి వసతి కింద సాగు చేయడం వల్ల ఖరీఫ్ కంటే ఎక్కువ దిగుబడి వస్తోందని శాస్త్రవేత్త తెలిపారు.

కలుపు నివారణలో మొదటి చర్య విత్తిన 48 గంటల్లోపు చేయాలి. నేలలో తేమ ఉన్నప్పుడు ఎకరాకు ఒక లీటర్ Pendimethalin చొప్పున స్ప్రే చేయాలి. దీని వల్ల మొదట మొలిచే కలుపును అరికట్టవచ్చు. ఆ తర్వాత 20 నుంచి 25 రోజుల దశలో గడ్డి జాతి, వెడల్పాకు కలుపులు ఎక్కువగా ఉంటే ఎకరాకు 300 ml imazethapyr ను 200 లీటర్ల నీటిలో కలిపి పిచికారీ చేయాలి.

ఎరువుల విషయంలో చివరి దుక్కిలో ఎకరాకు నాలుగు బస్తాల Single Super Phosphate, అర బస్తా యూరియా వేయాలి. SSP లో కాల్షియం, సల్ఫర్ ఉంటాయి. ఇవి కాయల్లో నూనె శాతం పెరగడానికి, కాయ సైజు పెరగడానికి సహాయపడతాయి. పంట 30 నుంచి 40 రోజుల దశలో ఉన్నప్పుడు, ఊడలు దిగే సమయంలో ఎకరాకు 200 కిలోల జిప్సం వేయాలి. దీని వల్ల ఊడలు ఎక్కువగా దిగి గింజ బాగా ఊరుతుంది.

30 రోజుల దశలో గుంటుక లేదా నాగలితో ఒకసారి అంతర సేద్యం చేయాలి. దీని వల్ల ఊడలు లోపలికి దిగి కాయలు ఎక్కువగా వస్తాయి. ఏ పంట విత్తినా విత్తన శుద్ధి చేయడం వల్ల విత్తనం, నేల ద్వారా వ్యాపించే తెగుళ్లను అరికట్టవచ్చు. విత్తిన తర్వాత మొదటి మూడు నుంచి నాలుగు వారాలు కలుపుతో పోటీ క్రిటికల్ పీరియడ్ అని శాస్త్రవేత్త తెలిపారు. ఈ సమయంలో పంటను కలుపు నుంచి కాపాడుకుంటే పోషకాలను సమగ్రంగా తీసుకుని అధిక దిగుబడి వస్తుందని ఆయన చెప్పారు.