జపాన్ యుద్ధ విషాదం: ప్రపంచాన్ని కలిచివేసిన బాలుడి ఫోటో వెనుక కథ

1945లో జపాన్‌లోని హిరోషిమా, నాగసాకి నగరాలపై అణుబాంబులు పడ్డాయి. ఆ విషాదం నుంచి ఆ నగరాలు ఇప్పటికీ పూర్తిగా కోలుకోలేదు. ఆ సమయంలో తీసిన ఒక ఫోటో ఈ రోజు కూడా ప్రపంచాన్ని కలిచివేస్తుంది.

ఆ ఫోటో తీసినది అమెరికాలోని పెన్సిల్వేనియాకు చెందిన ఫోటో జర్నలిస్ట్ జో ఓ డోనెల్. ఆయనను అప్పటి US మిలిటరీ జపాన్‌కు పంపింది. అక్కడ ఆయన తీసిన ఫోటోలు ఆయనకు ప్రపంచవ్యాప్త గుర్తింపు తెచ్చాయి.

ఫోటోలో 10 ఏళ్ల బాలుడు ఉన్నాడు. తన వీపున ఒక శిశువును మోస్తూ ఆ బాలుడు నిలబడి ఉన్నాడు. అతడి కాళ్లకు చెప్పులు లేవు. ముఖంలో ఆందోళన, ఆవేదన స్పష్టంగా కనిపిస్తున్నాయి.

ఆ ప్రదేశం పార్క్ కాదు, స్మశానం. యుద్ధంలో చనిపోయిన వారి మృతదేహాలను అక్కడ దహనం చేస్తున్నారు. క్యూలో నిలిచిన వారిలో ఆ బాలుడు ఒకడు. యుద్ధంలో తన కుటుంబ సభ్యులను అతడు కోల్పోయాడు.

జో ఓ డోనెల్ కెమెరాతో ఆ బాలుడి ఫోటో తీశారు. కొద్దిసేపటికి కాటికాపరులు అక్కడకు వచ్చారు. బాలుడి వీపున ఉన్న సంచిని వారు విప్పారు. అందులో మృతి చెందిన శిశువు ఉంది. ఆ శిశువును కట్టెలపై పెట్టి వారు దహనం చేశారు.

ఆ దృశ్యాన్ని చూసి ఫోటో జర్నలిస్ట్ కళ్లు చెమర్చాయి. తన తమ్ముడి మృతదేహం కళ్ల ముందే దహనం అవుతుంటే ఆ బాలుడు కదలకుండా నిలబడి ఉన్నాడు. చితి మంటల కాంతి అతడి కళ్లలో ప్రతిబింబించింది. తీవ్ర భావోద్వేగానికి గురైనా జో ఓ డోనెల్ తన వృత్తి ధర్మం నిర్వర్తించారు.