గుడ్డెందొడ్డి రిజర్వాయర్ సామర్థ్యం 15 టీఎంసీలకు పెంపు: డీపీఆర్ సిద్ధం

జోగులంబ గద్వాల జిల్లాలోని గుడ్డెందొడ్డి రిజర్వాయర్ సామర్థ్యాన్ని 1.02 టీఎంసీల నుంచి 15 టీఎంసీలకు పెంచేందుకు అధికారులు డీపీఆర్ (డిటైల్డ్ ప్రాజెక్ట్ రిపోర్ట్) సిద్ధం చేశారు.

నెట్టెంపాడు ప్రాజెక్టులో భాగమైన ఈ రిజర్వాయర్ విస్తరణకు 560 ఎకరాల భూసేకరణ అవసరమని అధికారులు అంచనా వేశారు. ప్రాజెక్టు అంచనా వ్యయం దాదాపు 8 వేల కోట్ల రూపాయలకు చేరుతుందని తెలిపారు.

పాలమూరు రంగారెడ్డి వట్టం జలాశయం తరహాలో రింగ్ బండ్ పద్ధతిలో ఈ జలాశయాన్ని విస్తరించాలని ప్రతిపాదించారు. ప్రస్తుత కరకట్ట ఎత్తు 50 నుంచి 60 మీటర్లకు పెంచే అవకాశం ఉన్నట్లు నీటిపారుదల శాఖ అధికారి రహీముద్దీన్ తెలిపారు.

తెలంగాణ ముఖ్యమంత్రి ఆదేశాలతో సర్వే పూర్తయిందని, రింగ్ బండ్ పద్ధతితో తక్కువ భూమిలో ఎక్కువ నిల్వ సామర్థ్యం సాధించేలా డిజైన్ చేస్తున్నామని రహీముద్దీన్ చెప్పారు. రిజర్వాయర్ నుంచి నీటిని విడుదల చేసే సమయంలో విద్యుత్ ఉత్పత్తి చేసే ప్రణాళిక కూడా ఉన్నట్లు ఆయన వివరించారు.

స్థానిక ఎమ్మెల్యే బండ్ల కృష్ణమోహన్ రెడ్డి అధికారులతో కలిసి ప్రాజెక్టు ప్రాంతాన్ని పరిశీలించారు. రైతులకు ఇబ్బంది లేకుండా, క్రాప్ హాలిడే సమస్య రాకుండా కొత్తగా నిర్మాణం చేపడతామని అధికారులు తెలిపారు.