మహిళా కమిషన్ ముందు హాజరైన గుడివాడ అమర్నాథ్; వ్యాఖ్యలను రాజకీయ వ్యంగ్యమేనని సమర్థన

వైఎస్సార్ కాంగ్రెస్ పార్టీ నేత, మాజీ మంత్రి గుడివాడ అమర్నాథ్ రాష్ట్ర మహిళా కమిషన్ ముందు హాజరయ్యారు. ఇటీవల చోడవరంలో జరిగిన ‘వెన్నుపోటు’ కార్యక్రమంలో తాను చేసిన వ్యాఖ్యలపై కమిషన్ స్వయంప్రేరణతో జారీ చేసిన నోటీసులకు సమాధానంగా ఆయన ఈరోజు మంగళగిరిలో కమిషన్ ఎదుట వివరణ ఇచ్చారు.

అమర్నాథ్ చేసిన మూడు ప్రధాన వ్యాఖ్యలపై కమిషన్ ప్రశ్నించింది. హోం మంత్రి వంగలపూడి అనితను ఉద్దేశించి ‘మేకప్ మంత్రి’ అనడం, ఉద్యోగాలకు సంబంధించి చేసిన వ్యాఖ్యలు, తాను వదిలేసిన బుల్లెట్ ప్రూఫ్ వాహనాన్ని అనిత వాడుతున్నారన్న వ్యాఖ్యలపై వివరణ కోరారు. ఈ వ్యాఖ్యలు మహిళా లోకాన్ని కించపరిచాయన్న ఆరోపణలపై ఆయన స్పందిస్తూ, ఇవి కేవలం రాజకీయ వ్యంగ్యం, రాజకీయ వ్యాఖ్యలు మాత్రమేనని, మహిళలందరినీ కించపరిచే ఉద్దేశం తనకు లేదని తెలిపారు.

ఈ సందర్భంగా అమర్నాథ్ హోం మంత్రి అనితపై తీవ్ర విమర్శలు చేశారు. రాష్ట్రంలో మహిళలపై దాడులు, పిల్లల అదృశ్యం వంటి ఘటనలపై ఆమె స్పందించలేదని, ప్రభుత్వం విమర్శల నుంచి దృష్టి మరల్చేందుకు కమిషన్ ద్వారా తనపై చర్య తీసుకుంటోందని ఆరోపించారు. డిప్యూటీ సీఎం పవన్ కల్యాణ్, డిప్యూటీ స్పీకర్ వంటి నేతలు కూడా అనిత చేతకాని వ్యక్తి అని చెప్పినట్టు ఆయన ఉదహరించారు. కమిషన్ ముందు తన తరఫు సీనియర్ న్యాయవాది సుధాకర్ రెడ్డి ద్వారా లిఖితపూర్వక వివరణ సమర్పించినట్టు అమర్నాథ్ తెలిపారు.