గుజరాత్‌లో ఉగ్ర కుట్ర భగ్నం: జైషే మహమ్మద్ అనుమానితులను అరెస్ట్ చేసిన ATS

గుజరాత్ యాంటీ టెర్రరిస్ట్ స్క్వాడ్ (ATS) దేశంలో భారీ ఉగ్ర కుట్రను భగ్నం చేసింది. నిషేధిత ఉగ్ర సంస్థ జైషే మహమ్మద్ (JeM) తో సంబంధాలు ఉన్న ఐదుగురిని అరెస్ట్ చేసింది.

పఠాన్ జిల్లాలోని ఖడియాల్ గ్రామంలో గురువారం ఈ అరెస్టులు జరిగాయి. ఈ నెల ప్రారంభంలో అదే మాడ్యూల్ కు చెందిన ఎనిమిది మందిని ఇప్పటికే అదుపులోకి తీసుకున్నారు. ఆ ఎనిమిది మందిని విచారించగా ఈ ఐదుగురి పేర్లు వెలుగులోకి వచ్చాయని అధికారులు తెలిపారు.

ఈ మొత్తం 13 మంది అనుమానితులు జైషే మహమ్మద్ తో సంబంధాలు కలిగి ఉన్నారని, దేశంలోని పలు ప్రాంతాల్లో టైం బాంబుల పేలుళ్లకు కుట్ర పన్నారని విచారణలో తెలిసింది. గుజరాత్ లో క్రియాశీల ఉగ్ర నెట్వర్క్ ఏర్పాటు చేసేందుకు వీరు ప్రయత్నిస్తున్నారని గతంలో పోలీసులు తెలిపారు.

అరెస్టు చేసిన ఐదుగురిని కోర్టులో హాజరు పరచగా, జూలై 24 వరకు ATS కస్టడీకి అప్పగించారు. గత జూలై 3న గుజరాత్, మధ్యప్రదేశ్ లోని పలు ప్రాంతాల్లో ఎనిమిది మందిని అరెస్ట్ చేసిన సంగతి తెలిసిందే.

తాజా అరెస్టులతో ఈ మాడ్యూల్ కు సంబంధించి మరిన్ని వివరాలు బయటపడుతున్నాయి. ATS అధికారులు దేశంలో పెద్ద ఎత్తున పేలుళ్లను అడ్డుకున్నట్లు చెబుతున్నారు.