పార్లమెంట్ వర్షాకాల సెషన్‌కు ముందు మంత్రుల కీలక సమావేశం; జేపీసీ నివేదిక రేపు సమర్పణ

పార్లమెంట్ వర్షాకాల సమావేశాలకు సిద్ధం కావడంతో కేంద్రం కసరత్తు మొదలుపెట్టింది. రాజనాథ్ సింగ్ అధ్యక్షతన శనివారం కర్తవ్య భవన్‌లో గ్రూప్ ఆఫ్ మినిస్టర్స్ (GoM) సమావేశం జరుగుతోంది.

ఈ భేటీలో కీలక బిల్లుల ఆమోదం, ప్రతిపక్షాల ప్రశ్నలకు సమాధానాల వ్యూహం రూపొందించనున్నారు. అమిత్ షా, జే.పి. నడ్డా, కిరణ్ రిజిజు, పీయూష్ గోయల్ తదితర సీనియర్ మంత్రులు హాజరయ్యారు. ఆర్థిక పరిస్థితి, నిరుద్యోగం, ఇథనాల్ బ్లెండింగ్, నీట్ పేపర్ లీక్, అయోధ్య రామ మందిర విరాళాల ఆరోపణల వంటి అంశాలను ప్రతిపక్షాలు లేవనెత్తే అవకాశంపైనా చర్చ జరుగుతోంది.

మరోవైపు, 130వ రాజ్యాంగ సవరణ బిల్లుపై గల జాయింట్ పార్లమెంటరీ కమిటీ (జేపీసీ) తన తుది సమావేశం నిర్వహిస్తోంది. బీజేపీ ఎంపీ అపరాజిత సారంగి నేతృత్వంలోని 31 మంది ఎంపీల కమిటీ ఈ రోజు పార్లమెంటుకు నివేదిక సమర్పించనుంది. ప్రజాప్రతినిధులు జైలు శిక్ష పడితే పదవి రద్దు అనే నిబంధనకు బదులు సస్పెన్షన్, ఫాస్ట్ ట్రాక్ కోర్టుల ఏర్పాటు వంటి సిఫారసులు చేసే అవకాశం ఉన్నట్లు తెలుస్తోంది.

ఏపీ నుంచి లావు శ్రీకృష్ణదేవరాయులు, బాలశౌరి, తెలంగాణ నుంచి లక్ష్మణ్, డీకే అరుణ తదితర ఎంపీలు కమిటీలో సభ్యులుగా ఉన్నారు. ఈ బిల్లులు పార్లమెంట్ ఎజెండాలో చేరనప్పటికీ, ఉభయ సభల్లో టేబుల్ చేసే అవకాశం ఉందని వర్గాలు తెలిపాయి.