AP వర్షాల హెచ్చరిక: బలపడుతున్న అల్పపీడనం.. పిడుగులతో భారీ వర్షాలు

వాయవ్య బంగాళాఖాతంలో ఒడిశా సమీపంలో ఏర్పడిన అల్పపీడనం క్రమంగా బలపడుతోంది. ఈ అల్పపీడనం ప్రభావంతో కోస్తాంధ్ర, తెలంగాణ, మహారాష్ట్ర వరకు ద్రోణి విస్తరించి ఉంది.

ఆంధ్రప్రదేశ్ విపత్తుల నిర్వహణ సంస్థ తెలిపిన వివరాల ప్రకారం, ఏపీలో నేడు మేఘావృతమైన వాతావరణంతో పాటు అక్కడక్కడ పిడుగులతో కూడిన తేలికపాటి నుండి మోస్తరు వర్షాలు కురిసే అవకాశం ఉంది. శ్రీకాకుళం, విజయనగరం, పార్వతీపురం మన్యం, తూర్పు గోదావరి, పశ్చిమ గోదావరి, ఏలూరు, అనంతపురం జిల్లాల్లో తేలికపాటి నుండి మోస్తరు వర్షాలు పడే అవకాశం ఉంది. మిగిలిన జిల్లాల్లో కొన్ని చోట్ల తేలికపాటి వర్షాలు కురుస్తాయని అంచనా వేసింది. వర్షాల సమయంలో గంటకు 40 నుండి 50 కిలోమీటర్ల వేగంతో గాలులు వీస్తాయని హెచ్చరించింది.

తెలంగాణకు సంబంధించి హైదరాబాద్ వాతావరణ కేంద్రం వివరాలు వెల్లడించింది. అల్పపీడనం ప్రభావంతో తెలంగాణలో మూడు రోజుల పాటు వర్షాలు కురిసే అవకాశం ఉందని తెలిపింది. ముఖ్యంగా ఉత్తర, ఈశాన్య తెలంగాణలో ఆదిలాబాద్, మంచిర్యాల, నిర్మల్, కొమరం భీం ఆసిఫాబాద్, నిజామాబాద్, కామారెడ్డి, కరీంనగర్, జగిత్యాల, పెద్దపల్లి, రాజన్న సిరిసిల్ల, జయశంకర్ భూపాలపల్లి, ములుగు, హనుమకొండ, వరంగల్, సిద్దిపేట, మెదక్ జిల్లాల్లో వర్షాలు అధికంగా ఉంటాయని అంచనా వేసింది. హైదరాబాద్ మరియు పరిసర ప్రాంతాల్లో మోస్తరు జల్లులు పడే అవకాశం ఉందని, పగటిపూట ఆకాశం సాధారణంగా మేఘావృతమై ఉంటుందని పేర్కొంది.