RTGS CCTV 360: ఏపీలో ఏఐ కెమెరాలతో నేరాలపై నిఘా, 24 గంటల్లో చిన్నారి రక్షణ

ఆంధ్రప్రదేశ్ ప్రభుత్వం ఏర్పాటు చేసిన RTGS CCTV 360 వ్యవస్థ AI సాంకేతికతతో నేర నియంత్రణలో కీలకంగా మారింది. రాష్ట్రవ్యాప్తంగా 14,750 AI కెమెరాలు అనుమానితుల కదలికలను గుర్తించి పోలీసులకు రియల్ టైం అలర్ట్లు అందిస్తున్నాయి.

ఈ నెల 1వ తేదీన బాపట్ల జిల్లా చీరాలలో తల్లి వడిలో నుంచి 6 నెలల శిశువును ఎత్తుకెళ్లిన కేసులో, కెమెరాలు అలర్ట్ ఇవ్వడంతో కేవలం 24 గంటల్లోనే నిందితుడు పట్టుబడ్డాడు. శిశువును తల్లికి అప్పగించారు.

గుంటూరులో Honda Activa స్కూటర్ చోరీ కేసులో ఒకే అలర్ట్‌తో నిందితుడిని అదుపులోకి తీసుకొని, అతడు దొంగిలించిన మరో 7 వాహనాలు స్వాధీనం చేసుకున్నారు. గత 4 నెలల్లో 81 చోరీ వాహనాలు గుర్తించారు, 73 మంది అదృశ్యమైన వారిని కనుగొన్నారు, 52 మంది నిందితులను గుర్తించారు.

విజయవాడ, నందిగామ, విసన్నపేట, మదనపల్లె తదితర ప్రాంతాల్లో వాహన చోరీల ఛేదనలో ఈ వ్యవస్థ సమర్థంగా పనిచేసింది. మైలవరం, ఎస్సార్ పేట, రెడ్డిగూడెం ప్రాంతాల్లో ఫేషియల్ రికగ్నిషన్ సాయంతో మిస్సింగ్ వ్యక్తులను వారి కుటుంబాల చెంతకు చేర్చారు.

పోలీసింగ్‌లో RTGS CCTV 360 కొత్త అధ్యాయాన్ని సూచిస్తోందని పోలీసు అధికారులు తెలిపారు.