ఆటోమేటిక్ అనర్హత బిల్లుపై జేపీసీ తుది సమావేశం నేడు; పార్లమెంట్‌కు నివేదిక

ప్రజా ప్రతినిధులు 30 రోజులు జైల్లో ఉండి బెయిల్ రాకపోతే స్వయంచాలకంగా అనర్హత చెందే నిబంధనతో కేంద్రం తీసుకొచ్చిన 130వ రాజ్యాంగ సవరణ బిల్లుపై సంయుక్త పార్లమెంటరీ కమిటీ (జేపీసీ) నేడు తుది సమావేశం జరపనుంది. బీజేపీ ఎంపీ అపరాజిత సారంగి నేతృత్వంలోని 31 మంది సభ్యుల కమిటీ పార్లమెంట్ అనెక్స్ భవనంలో సమావేశమై నివేదికను ఖరారు చేసి, పార్లమెంటుకు ఈ రోజే సమర్పించనుంది.

ఈ బిల్లు చట్టంగా మారితే, ఎన్నికైన ప్రజా ప్రతినిధులు 30 రోజులపాటు జ్యుడీషియల్ కస్టడీలో ఉంటే స్వయంచాలకంగా వారి పదవులు కోల్పోతారు. ముఖ్యంగా ఈ బిల్లును దుర్వినియోగం చేసి కేంద్ర ఏజెన్సీల ద్వారా విపక్ష పాలిత రాష్ట్ర ప్రభుత్వాలను లక్ష్యంగా చేసుకునే అవకాశం ఉందని ప్రతిపక్షాలు ఆందోళన వ్యక్తం చేశాయి.

ఈ నేపథ్యంలో, జేపీసీ తన నివేదికలో కీలక సవరణలు సూచించే అవకాశం ఉంది. పదవిని పూర్తిగా తొలగించకుండా సస్పెండ్ చేయడం, తీవ్రమైన నేరాల కేసులకు మాత్రమే ఈ చట్టాన్ని పరిమితం చేయడం, ప్రజా ప్రతినిధుల కేసుల విచారణకు ఫాస్ట్ ట్రాక్ కోర్టుల ఏర్పాటు వంటి సిఫారసులు చేసినట్లు సమాచారం.

ఈ సమావేశంలో తెలంగాణ నుంచి బీజేపీ ఎంపీలు డాక్టర్ కే లక్ష్మణ్, డీకే అరుణ పాల్గొననున్నారు.