మద్యం మత్తులో దారుణం: కృష్ణా జిల్లాలో తండ్రి నిద్రపోతున్న కుమారుడిని కొట్టి చంపాడు

కృష్ణా జిల్లా మచిలీపట్నం మండలం బొట్లవాణిపాలెం గ్రామంలో గురువారం రాత్రి దారుణ ఘటన చోటు చేసుకుంది. గ్రామానికి చెందిన రామ్మోహన్రావు మద్యం మత్తులో తన కుమారుడు కళ్యాణ చక్రవర్తిని కర్రతో కొట్టి చంపాడు.

తండ్రి, కుమారుడు ఇద్దరికీ మద్యం అలవాటు ఉన్నట్లు స్థానికులు తెలిపారు. గురువారం రాత్రి కళ్యాణ చక్రవర్తి మద్యం సేవించి ఇంటికి వచ్చి నిద్రపోయాడు. కొద్దిసేపటి తర్వాత తండ్రి రామ్మోహన్రావు కూడా మద్యం మత్తులో ఇంటికి వచ్చి, కొడుకు నిద్రపోతుండగా కర్రతో దాడి చేశాడు. ఈ దాడిలో తీవ్ర రక్తస్రావం కావడంతో కళ్యాణ చక్రవర్తి అక్కడికక్కడే మరణించాడు.

బాధిత కుటుంబ సభ్యులు కళ్యాణ్‌ను ఆస్పత్రికి తరలించగా, అప్పటికే అతడు మృతి చెందినట్లు వైద్యులు నిర్ధారించారు. మచిలీపట్నం రూరల్ పోలీసులు ఘటనాస్థలానికి చేరుకుని కేసు నమోదు చేశారు. రామ్మోహన్రావును అదుపులోకి తీసుకుని దర్యాప్తు ప్రారంభించారు.

రెండు రోజుల క్రితం కూడా కళ్యాణ్ మద్యం తాగి తండ్రితో గొడవపడి చేయి చేసుకున్నాడని కుటుంబ సభ్యులు తెలిపారు. ఈ ఘటన గ్రామంలో విషాదాన్ని నింపింది.