హనుమకొండ జిల్లాలో భారీ వర్షాలు: రోడ్లపై వరద నీరు, రాకపోకలకు అంతరాయం

హనుమకొండ జిల్లాలో సోమవారం ఉదయం నుండి కురుస్తున్న భారీ వర్షాలతో పలు ప్రాంతాల్లో రోడ్లు జలమయమయ్యాయి. హనుమకొండ నుండి హైదరాబాద్ వెళ్లే ప్రధాన రహదారితో పాటు నగరంలోని బస్టాండ్, చౌరస్తా ప్రాంతాలు వరద నీటిలో మునిగాయి. వాహనాల రాకపోకలు స్తంభించడంతో విద్యార్థులు, ఉద్యోగస్తులు తీవ్ర అసౌకర్యానికి గురయ్యారు.

వాతావరణ శాఖ హెచ్చరిక ప్రకారం, వాయువ్య బంగాళాఖాతంలో ఏర్పడిన ద్రోణి ప్రభావంతో రాష్ట్రంలోని ఆదిలాబాద్, మంచిర్యాల, నిర్మల్, నిజామాబాద్, కామారెడ్డి, జయశంకర్ భూపాలపల్లి, ములుగు జిల్లాల్లో మోస్తరు వర్షాలు కురుస్తాయని అంచనా. భద్రాద్రి కొత్తగూడెం, వికారాబాద్, సంగారెడ్డి, మెదక్ జిల్లాలకు ఐఎండీ ఎల్లో అలర్ట్ జారీ చేసింది. గంటకు 50 కిలోమీటర్ల వేగంతో ఈదురుగాలులు వీచే అవకాశం ఉంది.

హనుమకొండ జిల్లాలో కమలాపూర్, ఎల్కతుర్తి, భీమదేవరపల్లి మండలాల్లో ఉదయం నుంచి వర్షం కురుస్తున్నట్లు స్థానికులు చెప్పారు. ఇటీవల ఎండల తీవ్రతతో ఇబ్బందిపడిన ప్రజలకు ఈ వర్షం కాస్త ఉపశమనం కలిగించింది. అయితే నగరంలోని లోతట్టు ప్రాంతాలు, రోడ్లపై నీరు నిలిచిపోవడంతో షాపుల్లోకి నీరు చేరి వ్యాపారాలు నిలిచిపోయాయి. హనుమకొండ చౌరస్తాలో మోకాలి లోతు నీరు రావడంతో విద్యార్థులు కళాశాలలకు వెళ్లలేకపోతున్నారు.

సర్క్యూట్ గెస్ట్ హౌస్ సమీపంలోని నాలాను శుభ్రం చేయకపోవడంతో నీరు రోడ్లపైకి వచ్చి రాకపోకలు నిలిచిపోయాయని స్థానికులు ఆరోపించారు. అధికారులు ముందస్తు చర్యలు చేపట్టాలని డిమాండ్ చేశారు. ఇదిలా ఉండగా, ఈ వర్షాలు పత్తి, మిర్చి పంటలకు మేలు చేసినట్లు రైతులు చెబుతున్నారు.

వాతావరణ శాఖ తదుపరి మూడు రోజుల పాటు రాష్ట్రంలోని పలు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని తెలిపింది. మిగిలిన జిల్లాల్లో కొంతమేర జల్లులు పడే సూచనలు ఉన్నాయి.