గుజరాత్, మహారాష్ట్ర ప్రభుత్వాలు అనలాగ్ పనీర్ పై నిషేధం

గుజరాత్, మహారాష్ట్ర ప్రభుత్వాలు 'అనలాగ్ పనీర్' పై నిషేధం విధించాయి. ఆరోగ్యానికి హాని కలిగించే ఈ పదార్థాన్ని వాడకుండా నిరోధించేందుకు ఈ నిర్ణయం తీసుకున్నాయి.

అనలాగ్ పనీర్ అంటే, పాలు నుండి తయారు చేసే సహజ పనీర్కు ప్రత్యామ్నాయంగా వెజిటబుల్ ఆయిల్స్, పిండి వంటి పదార్థాలతో తయారు చేస్తారు. దీనిలో పాల ఫ్యాట్ ఉండదు. అందుకే సహజ పనీర్ కంటే చౌకగా తయారు చేయవచ్చు. ఇలా తయారైన ఈ పనీర్లో ఆర్టిఫిషియల్ ఫ్లేవర్స్, ప్రిజర్వేటివ్స్ కూడా కలుపుతారు.

నిపుణుల అభిప్రాయం ప్రకారం, ఇందులో ప్రోటీన్ తక్కువగా ఉండడంతో పాటు, పోషకాలు కూడా చాలా తక్కువ. దీన్ని తరచూ తినడం వల్ల కొలెస్ట్రాల్ స్థాయిలు పెరిగి గుండె జబ్బులు, ఒబెసిటీ వచ్చే ప్రమాదం ఉంది. ఇంకా జీర్ణ సమస్యలు, అలర్జీలు వంటి దీర్ఘకాలిక ఆరోగ్య సమస్యలు తలెత్తుతాయని వైద్యులు హెచ్చరిస్తున్నారు.

కొన్ని హోటళ్లు, ఫుడ్ కోర్ట్‌లు అనలాగ్ పనీర్నే నిజమైన పనీర్గా వినియోగదారులకు తెలియకుండా సర్వ్ చేస్తున్నాయని ఫిర్యాదులు వచ్చాయి. దీంతో ఈ రాష్ట్ర ప్రభుత్వాలు చర్యలు తీసుకున్నాయి. నిబంధనలు ఉల్లంఘించి అనలాగ్ పనీర్, బటర్ తయారు చేసినా, ఆహారంలో కలిపినా కఠిన చర్యలు తప్పవు. అటువంటి వారికి లక్ష రూపాయల జరిమానాతో పాటు 6 నెలల జైలు శిక్ష విధిస్తారు. ఒకవేళ ఈ పదార్థం తిని ఎవరైనా మరణిస్తే 10 లక్షల జరిమానా, జీవిత ఖైదు కూడా ఎదురు కావచ్చు.