గుంటూరులో ఉచిత వేద పాఠశాల: ఏటా 50 మంది బ్రాహ్మణ విద్యార్థులకు ప్రవేశం

గుంటూరులో బ్రాహ్మణ విద్యార్థులకు ఉచితంగా వేద విద్య అందిస్తున్న పాఠశాల కొనసాగుతోంది. క్రేన్ రిలీజియస్ ట్రస్ట్ ఆధ్వర్యంలో శ్రీ వరసిద్ధి విఘ్నేశ్వర వేద ఆగమ స్మార్త పాఠశాల నిర్వహణ జరుగుతోంది. సంవత్సరానికి ఇక్కడ 50 మంది విద్యార్థులకు ప్రవేశం కల్పిస్తున్నారు.

గ్రంధి సుబ్బారావు ధర్మపత్ని లక్ష్మీ నరసింహ పేరిట ఈ ఉచిత పాఠశాలను గ్రంధి కాంతారావు నిర్మించారు. సాంప్రదాయబద్ధంగా ఉపనయనం జరిగిన బ్రాహ్మణ విద్యార్థులను మాత్రమే ఇక్కడ చేర్చుకుంటున్నారు.

ఇక్కడ వేదం, స్మార్తం, శైవాగమం, వైఖానసాగమం అనే నాలుగు విభాగాల్లో బోధన జరుగుతోంది. శైవులు, వైష్ణవులకు భేదం లేకుండా ఈ విద్య అందించాలనే ఉద్దేశంతో ఈ నాలుగు పాఠ్యాంశాలను ప్రవేశపెట్టారు. వేదంతో పాటు సంస్కృతంలోనూ విద్యార్థులు పట్టు సాధిస్తున్నారు.

పురాతన మండువా లోగిళ్లలో విద్యార్థులు వేదాలు అభ్యసిస్తున్నారు. కలసానికి దారం చుట్టడం, అమ్మవారికి చీర కట్టడం, హోమగుండాల ఏర్పాటు, యజ్ఞ యాగాది క్రతువుల నిర్వహణ వరకు ప్రయోగాత్మక శిక్షణ ఇస్తున్నారు. ఏటా 50 సీట్లకు రెట్టింపు సంఖ్యలో దరఖాస్తులు వస్తున్నాయని తెలుస్తోంది.