గురుపౌర్ణిమ ప్రత్యేకత: తల్లి, తండ్రి, గురువు ప్రాధాన్యత — శృంగేరి స్వామి వారి ప్రవచనం

గురుపౌర్ణిమ సందర్భంగా శృంగేరి శారదా పీఠం పీఠాధిపతి జగద్గురు శ్రీ శ్రీ శ్రీ భారతీ తీర్థ మహాస్వామి తల్లి, తండ్రి, గురువు యొక్క ప్రాధాన్యతను వివరించారు. ఆధ్యాత్మిక ప్రవచనంలో భాగంగా ఆయన మాట్లాడుతూ ప్రతి మనిషి జీవితంలో తల్లిని, తండ్రిని, గురువును భగవంతునితో సమానంగా గౌరవించాలన్నారు.

విద్యలు లౌకిక, అలౌకిక విద్యలుగా విభజించవచ్చని వివరించారు. లౌకిక విద్య ఉద్యోగం, ఆరోగ్యం వంటి ప్రాపంచిక అవసరాలను తీరుస్తుంది. అలౌకిక విద్యలో అపర విద్య ధర్మాన్ని బోధిస్తుంది, పర విద్య బ్రహ్మవిద్య ద్వారా మోక్షాన్ని ప్రసాదిస్తుంది.

గురు పరంపర సాక్షాత్తు భగవంతుని నుంచి ప్రారంభమై సదాశివుడు, నారాయణుడు, వేదవ్యాసుడు, ఆదిశంకరుల ద్వారా నేటి శృంగేరి పీఠం వరకు కొనసాగుతున్నది. గురుపౌర్ణమిని వ్యాసపౌర్ణిమగా కూడా పిలుస్తారు. ఈ రోజున వేదవ్యాసుడిని, శంకరాచార్యులను పూజించి చాతుర్మాస్య వ్రతాన్ని ప్రారంభించడం ఆనవాయితీ.

ఈ సందర్భంగా భక్తులు గురు పరంపరను ఆరాధించి ఆత్మోద్ధరణకు మార్గం పొందాలని స్వామి సూచించారు.