ధాన్యం కొనుగోళ్లపై హరీష్ రావు విమర్శలు.. రైతులకు పరిహారం చెల్లించాలని డిమాండ్

సిద్దిపేటలో ధాన్యం కొనుగోలు కేంద్రాన్ని మాజీ మంత్రి, BRS నాయకుడు హరీష్ రావు ప్రారంభించారు. ఈ సందర్భంగా రాష్ట్రంలో ధాన్యం కొనుగోళ్ల నిర్వహణపై ఆయన ప్రభుత్వాన్ని విమర్శించారు.

ట్రాన్స్‌పోర్ట్ టెండర్లు, రైస్ మిల్లుల కేటాయింపులు పూర్తికాకుండానే కొనుగోలు కేంద్రాలు తెరుస్తున్నారని హరీష్ రావు అన్నారు. ప్రభుత్వానికి ముందుచూపు లేదని ఆయన విమర్శించారు. సన్నవడ్లు ప్రైవేట్ వ్యాపారుల చేతికి వెళ్తున్నాయని, అలాంటప్పుడు దొడ్డువడ్లు పండించిన రైతుల పరిస్థితి ఏంటని ఆయన ప్రశ్నించారు.

రాష్ట్రంలో కరువు పరిస్థితుల వల్ల సుమారు 25 లక్షల ఎకరాల్లో పంట ఎండిపోయింది. ఖమ్మం, కొత్తగూడెం, మహబూబాబాద్, వరంగల్, సిద్దిపేట, మెదక్ తదితర జిల్లాల్లో అకాల వర్షాలతో కళ్లాల్లో ఉన్న ధాన్యం తడిసిపోయింది. కొన్ని చోట్ల ధాన్యం కొట్టుకుపోయింది.

కొనుగోలు కేంద్రాలకు ఇంకా పాడీ క్లీనర్లు, టార్పలిన్ కవర్లు, మాయిస్చర్ మీటర్లు చేరలేదని హరీష్ రావు చెప్పారు. ట్రాన్స్‌పోర్ట్ టెండర్లు ఫైనల్ కాలేదని, మిల్లు అలాట్‌మెంట్ కూడా జరగలేదని ఆయన అన్నారు. ఈ పరిస్థితికి ప్రభుత్వ నిర్లక్ష్యమే కారణమని ఆయన ఆరోపించారు.

నష్టపోయిన పంటను క్షేత్రస్థాయిలో పరిశీలించి రైతులకు పరిహారం చెల్లించాలని ఆయన ప్రభుత్వాన్ని డిమాండ్ చేశారు. అన్ని గ్రామాల్లో వెంటనే కొనుగోలు కేంద్రాలు ప్రారంభించాలన్నారు. ట్రాన్స్‌పోర్ట్, మిల్లు అలాట్‌మెంట్ పనులు వెంటనే పూర్తి చేయాలని కోరారు. ఈ ఆరోపణలపై ప్రభుత్వం లేదా అధికార కాంగ్రెస్ పార్టీ స్పందన లభ్యం కాలేదు.