యూట్యూబ్ చూసి పాములు పట్టడం నేర్చుకున్న మహిళా హెడ్ కానిస్టేబుల్.. 600కు పైగా స్నేక్‌లను రెస్క్యూ

హర్యానాలోని పంచకుల జిల్లాకు చెందిన మహిళా హెడ్ కానిస్టేబుల్ లోకేష్ కుమారి, ఎలాంటి అధికారిక శిక్షణ లేకుండా కేవలం యూట్యూబ్ వీడియోలు చూసి పాములు పట్టడం నేర్చుకున్నారు. ఆమె ఇప్పటివరకు 600కు పైగా పాములను సురక్షితంగా పట్టుకొని అడవి ప్రాంతాల్లో విడిచిపెట్టారు.

పంచకుల జిల్లా పోలీస్ లైన్‌లోని స్పెషల్ క్రైమ్ బ్రాంచ్ కార్యాలయంలో హెడ్ కానిస్టేబుల్‌గా విధులు నిర్వర్తిస్తున్న లోకేష్ కుమారికి ఇటీవల ఆఫీసులో ఒక నల్లటి పాము కనిపించిందని సమాచారం వచ్చింది. ఆ పాము వాష్‌రూమ్ పైపుల్లోకి వెళ్లి దాక్కుంది. దాదాపు గంటపాటు వెతికినా పాము బయటకు రాకపోవడంతో, కొద్దిగా పెట్రోల్ తెప్పించి ఆమె ఆ ప్రాంతంలో స్ప్రే చేశారు. పెట్రోల్ వాసన తట్టుకోలేక ఒక పెద్ద మగ కోబ్రా బయటకు వచ్చి పాకసాగింది. దాన్ని క్షణాల్లో తన ప్రత్యేక పరికరంతో సులభంగా పట్టుకున్నారు. అనంతరం సురక్షితంగా సమీప అటవీ ప్రాంతంలో విడిచిపెట్టారు.

గత పదేళ్లుగా ఆమె ఎలాంటి ప్రొఫెషనల్ ట్రైనింగ్ తీసుకోకుండా, వివిధ జాతుల పాములను పట్టుకునే పద్ధతులను యూట్యూబ్ ద్వారానే క్షుణ్నంగా నేర్చుకున్నారు. ఇప్పటి వరకు 600కు పైగా పాములను రెస్క్యూ చేసినట్లు ఆమె తెలిపారు.