హైదరాబాద్‌లో భారీ వర్ష హెచ్చరిక: 2 గంటల్లో వాన, ట్రాఫిక్‌ జాగ్రత్తలు

India Meteorological Department (IMD) హైదరాబాద్ నగరానికి భారీ వర్ష హెచ్చరిక జారీ చేసింది. రాబోయే రెండు గంటల్లో నగరంలోని పలు ప్రాంతాల్లో మోస్తరు నుంచి భారీ వర్షాలు కురిసే అవకాశం ఉందని అధికారులు తెలిపారు.

గత కొన్ని రోజులుగా హైదరాబాద్‌లో ఒక్కసారిగా వర్షాలు కురుస్తుండటంతో ట్రాఫిక్ సమస్యలు తలెత్తుతున్నాయి. సాయంత్రం వేళలో వర్షం పడితే ఆఫీసుల నుంచి ఇళ్లకు వెళ్లేవారి రద్దీ పెరిగి ట్రాఫిక్ జామ్ అవుతుంది. దీంతో GHMC, HYDRAA అధికారులు ముందస్తు చర్యలు చేపట్టారు.

డ్రైనేజీ వ్యవస్థ కేవలం 2 సెంటీమీటర్ల వర్షపాతాన్ని మాత్రమే తట్టుకోగలదు. అయితే, వర్షపు నీరు వెంటనే డ్రైన్‌లోకి పోయేలా మ్యాన్‌హోల్స్‌పై ఓపెన్ గ్రిల్స్ ఏర్పాటు చేశారు. దీనివల్ల రోడ్లపై నీరు నిలవకుండా త్వరగా తగ్గుతుందని అధికారులు ఆశిస్తున్నారు. ఇప్పటికే GHMC ప్రాంతంలో కొన్ని చోట్ల వర్షం మొదలైంది.

మహబూబ్‌నగర్, రంగారెడ్డి, సంగారెడ్డి, వికారాబాద్ జిల్లాలో తేలికపాటి నుంచి మోస్తరు వర్షాలు కురిసే అవకాశం ఉంది. ఈదురుగాలులతో కూడిన వర్షం పడే అవకాశం ఉన్నందున చెట్లు, విద్యుత్ స్తంభాల కింద నిలబడొద్దని IMD సూచించింది. నగర వాసులు అప్రమత్తంగా ఉండాలని, ప్రయాణాల్లో జాగ్రత్తలు తీసుకోవాలని అధికారులు హెచ్చరించారు. ప్రజలు పబ్లిక్ ట్రాన్స్‌పోర్ట్ ఉపయోగించాలని, వీలైనంత త్వరగా ప్రయాణాలు ముగించుకోవాలని సూచించారు.