ఉత్తర భారతంలో భారీ వర్షాలు: వరదలు, కొండచరియలతో జనజీవనం స్తంభం

ఉత్తర భారతదేశంలోని పలు రాష్ట్రాల్లో భారీ వర్షాలు, వరదలు, కొండచరియలు విరిగిపడడంతో జనజీవనం తీవ్రంగా దెబ్బతింది.

ఢిల్లీలో నిన్న 160 మిల్లీమీటర్లకు పైగా వర్షపాతం నమోదై, ప్రధాన రోడ్లన్నీ నీట మునిగాయి. ఉత్తరాఖండ్‌లో భారీ నుంచి అతిభారీ వర్షాలు కురుస్తాయని వాతావరణ శాఖ హెచ్చరించింది. అలకనంద, మందాకిని నదులు ప్రమాదకర స్థాయి దాటడంతో లోతట్టు ప్రాంతాల ప్రజలను సురక్షిత ప్రాంతాలకు తరలిస్తున్నారు. రుద్రప్రయాగ జిల్లాలో పాఠశాలలకు సెలవు ప్రకటించారు. ఉత్తరకాశీలో కొండచరియ విరిగిపడి గంగోత్రి హైవే మూసేయడంతో చార్ధామ్ యాత్రికులు గంటల తరబడి రోడ్లపై చిక్కుకుపోయారు.

హిమాచల్ ప్రదేశ్‌లో రాష్ట్రవ్యాప్తంగా 75 ప్రధాన రోడ్లు దెబ్బతినగా, 29 విద్యుత్ ట్రాన్స్‌ఫార్మర్లు ధ్వంసమయ్యాయి, దీంతో పలు ప్రాంతాల్లో విద్యుత్ సరఫరా నిలిచిపోయింది. కిన్నోర్ జిల్లా లిపాక్ ప్రాంతంలో బురద, రాళ్లతో కూడిన ప్రవాహం లిపాక్ వంతెనను తాకుతూ ప్రవహించడంతో ఆ మార్గంలో రాకపోకలు నిలిపివేశారు, వంతెన కూలిపోయే ప్రమాదం ఉన్నందున ప్రజలను అప్రమత్తం చేశారు.

ఉత్తరప్రదేశ్‌లో పలు జిల్లాలకు వాతావరణ శాఖ రెడ్ అలర్ట్ జారీ చేసింది. గాజియాబాద్, మీరట్, హాపూర్, బులంద్‌షహర్, బాగ్‌పత్, ముజఫర్ నగర్, మొరాదాబాద్ జిల్లాల్లో పాఠశాలలకు సెలవు ప్రకటించారు. గుజరాత్‌లోని సూరత్ నగరంలో రోడ్లపై వరద నీరు చేరడంతో ట్రాఫిక్‌ సమస్య తీవ్రంగా ఉంది. మహారాష్ట్రలోని నాసిక్‌లో గోదావరి నది ఉగ్రరూపం దాల్చింది, త్రయంబకేశ్వర ప్రధాన రహదారి కొట్టుకుపోయింది, లోతట్టు ప్రాంతాల్లో ఇళ్లలోకి నీరు చేరింది.

జమ్మూ కాశ్మీర్‌లోని బండిపుర జిల్లా రాజధాన్ పాస్ వద్ద ఓ పర్యాటక కారు హ్యాండ్ బ్రేక్ వేయకపోవడంతో లోయలోకి దొర్లింది. కారులో ఉన్న యువకుడు చివరి నిమిషంలో బయటకు దూకడంతో తృటిలో ప్రాణాలతో బయటపడ్డాడు. ఈ ఘటనపై పోలీసులు కేసు నమోదు చేశారు. భారీ వర్షాల నేపథ్యంలో కొండ ప్రాంతాలకు ప్రయాణాలు వాయిదా వేసుకోవాలని అధికారులు సూచిస్తున్నారు.