హిందూపురంలో కార్డన్ సెర్చ్: పత్రాలు లేని 40 ద్విచక్ర వాహనాలు సీజ్

శ్రీ సత్యసాయి జిల్లా హిందూపురం పట్టణంలో పోలీసులు కార్డన్ సెర్చ్ నిర్వహించారు. అంబేద్కర్ నగర్‌లో జరిగిన ఈ తనిఖీల్లో పత్రాలు లేని 40 ద్విచక్ర వాహనాలను సీజ్ చేశారు.

అదనపు ఎస్పీ అంకిత సూరాణ ఆధ్వర్యంలో ఈ తనిఖీలు జరిగాయి. అనుమానాస్పద వ్యక్తులు, పాత నేరస్తులు, వాహనాలపై ప్రత్యేక దృష్టి పెట్టారు. ఉదయం 5 నుంచి 7 గంటల వరకు సెర్చ్ నిర్వహించినట్టు అదనపు ఎస్పీ తెలిపారు.

స్వాధీనం చేసుకున్న వాహనాలకు సంబంధించిన పత్రాలను పరిశీలిస్తామని పోలీసులు తెలిపారు. అవసరమైతే టౌన్ పోలీస్ స్టేషన్‌కు తరలిస్తామని చెప్పారు. రౌడీ షీటర్లు, పాత కేసుల్లో నిందితులకు పోలీసులు హెచ్చరికలు జారీ చేశారు. నేరాలకు పాల్పడితే కఠిన చర్యలు తప్పవని స్పష్టం చేశారు.

రాబోయే 20 రోజుల్లో మరిన్ని కార్డన్ సెర్చ్ ఆపరేషన్లు నిర్వహిస్తామని పోలీసులు తెలిపారు. సెప్టెంబర్‌లో వినాయక చవితి ఉత్సవాల నేపథ్యంలో ఇది ముందస్తు చర్యగా చేపట్టారు. పండుగలను సురక్షితంగా జరపడమే లక్ష్యమని అదనపు ఎస్పీ చెప్పారు.

వినాయక చవితి సందర్భంగా డ్రోన్ కెమెరాలతో నిఘా ఉంటుందని పోలీసులు తెలిపారు. యువత మద్యం సేవించి వాహనాలు నడపవద్దని సూచించారు. సైలెన్సర్ లేకుండా వాహనాలు నడపవద్దని కూడా హెచ్చరించారు. ఎలాంటి అవాంఛనీయ ఘటనలు జరగకుండా ముందస్తు చర్యలు తీసుకుంటామని అన్నారు.