హార్ముజ్ జలసంధిలో నౌకపై దాడి: ఒక భారతీయుడు మృతి, 10 మంది గాయం

హార్ముజ్ జలసంధిలో ఇరాన్ చేసిన దాడిలో యూఏఈకి చెందిన రెండు చమురు ట్యాంకర్లలో పనిచేస్తున్న ఒక భారతీయుడు మృతి చెందాడు. ఈ ఘటనలో 10 మంది గాయపడ్డారు, వీరిలో కొందరి పరిస్థితి విషమంగా ఉంది.

ఈ పరిణామంపై భారత్ తీవ్రంగా స్పందించింది. విదేశాంగ మంత్రిత్వ శాఖ ఉన్నత స్థాయి అత్యవసర సమావేశం ఏర్పాటు చేసి, ఇరాన్ డిప్యూటీ చీఫ్ ఆఫ్ మిషన్ మహమ్మద్ జవాద్ హుసేనీ సహా ఆ దేశ రాయభార ప్రతినిధులను పిలిపించి తీవ్ర నిరసన తెలిపింది. అంతర్జాతీయ మార్గాల్లో ప్రయాణించే వాణిజ్య నౌకలపై పనిచేసే భారతీయుల భద్రతపై ఆందోళన వ్యక్తం చేసింది. ఇలాంటి దాడులు మళ్లీ జరగకుండా చర్యలు తీసుకోవాలని, ఉద్రిక్తతలను తగ్గించుకొని చర్చల ద్వారా సమస్యలను పరిష్కరించుకోవాలని భారత్ సూచించినట్లు సమాచారం.

ఇరాన్ ప్రతినిధులు మాత్రం తమ దేశ రక్షణ విధానాన్ని సమర్థించుకున్నారు. అమెరికా ఉద్దేశపూర్వకంగా నౌకలను అనుమతి లేని అక్రమ మార్గాల్లో నడిపిస్తోందని, ఆ నౌకలు తమ హెచ్చరికలను పట్టించుకోలేదని, అందువల్ల దాడి చేయాల్సి వచ్చిందని వివరించారు. అనంతరం ఇరాన్ దౌత్యవేత్తలు విదేశాంగ శాఖ ప్రధాన కార్యాలయం నుంచి నిష్క్రమించారు.