సౌదీ అరామ్కో రిఫైనరీపై డ్రోన్ దాడిని హూతీలు ప్రకటించారు; మోకా పోర్ట్ దాడిలో 7 మంది మృతి

సౌదీ అరేబియాలోని జజాన్ నగరంలోని ఆరామ్కో చమురు శుద్ధి కర్మాగారంపై హూతీ తిరుగుబాటుదారులు డ్రోన్ దాడి చేసినట్లు ప్రకటించారు. ఈ దాడి తమ గగనతలంలోకి సౌదీ డ్రోన్లు చొరబడినందుకు ప్రతీకారమని హూతీ సైనిక ప్రతినిధి యాహ్యా సారి తెలిపారు.

దాడి తర్వాత రిఫైనరీలో మంటలు చెలరేగాయి. అయితే ఎలాంటి ప్రాణనష్టం జరగలేదని, మంటలను అదుపులోకి తెచ్చినట్లు సౌదీ ఇంధన శాఖ వెల్లడించింది.

అదే రోజు యెమెన్ లోని మోకా పోర్ట్ పై కూడా ఇరాన్ మద్దతు కలిగిన హూతీ తిరుగుబాటుదారులు క్షేపణలు, డ్రోన్లతో దాడులు చేశారు. ఈ దాడిలో నలుగురు సైనికులు, ముగ్గురు పౌరులు సహా ఏడుగురు మరణించారు. మరో 15 మంది గాయపడ్డారని యెమెన్ ప్రభుత్వ బలగాలు తెలిపాయి.

దాడి కారణంగా పోర్ట్ లోని భవనాలు, వాణిజ్య వస్తువులు, ఆహార నిల్వలు ధ్వంసమయ్యాయి. అదనంగా పేలుడు పదార్థాలతో నిండిన మానవరహిత పడవతో కూడా దాడికి ప్రయత్నించినట్లు సైనిక వర్గాలు పేర్కొన్నాయి.

ఇరాన్ మద్దతు గల హూతీ తిరుగుబాటుదారులు, సౌదీ నేతృత్వంలోని సంకీర్ణ దళాల మద్దతుతో పోరాడుతున్న యెమెన్ ప్రభుత్వం మధ్య కొనసాగుతున్న సుదీర్ఘ సంఘర్షణలో ఇవి తాజా పరిణామాలు.