పరిటాలలో తొలకరి వర్షాల తర్వాత వజ్రాల వేట ఊపు

ఎన్టీఆర్ జిల్లా కంచుకర్ల మండలం పరిటాల ప్రాంతంలో వజ్రాల వేట ఊపందుకుంది. తొలకరి వర్షాల తర్వాత పైమట్టి కొట్టుకుపోయి వజ్రాలు బయటపడతాయన్న నమ్మకంతో వందలాది మంది అన్వేషకులు పొలాల్లోకి చేరుతున్నారు.

కృష్ణా నది తీరాన ఉన్న ఈ ప్రాంతానికి వజ్రాలతో చారిత్రక అనుబంధం ఉంది. ప్రపంచ ప్రఖ్యాత కోహినూర్ వజ్రం ఇక్కడే లభించినట్లు చారిత్రక ఆధారాలు ఉన్నాయని స్థానికులు చెబుతుంటారు. నిజాం పాలన కాలంలో కూడా ఈ ప్రాంతంపై ప్రత్యేక దృష్టి ఉండేదని కథలు ఉన్నాయి. సుమారు 20 ఏళ్ల క్రితం జాతీయ రహదారి పనుల సమయంలో దొరికిన ఒక వజ్రం ముంబైలో కోట్ల రూపాయలు ధర పలికిందని చెప్పారు. అప్పటి నుంచి తొలకరి వర్షాలు కురిసిన ప్రతిసారీ ఈ అన్వేషణ సాగుతోంది.

నెల్లూరు, ఒంగోలు, భీమవరం, గుడివాడ, తెనాలి, నరసారావుపేట తదితర ప్రాంతాల నుంచి మహిళలు, వృద్ధులు సహా అనేకమంది ఇక్కడికి చేరుకుంటున్నారు. తెల్లవారు జామునే పొలాలకు చేరుకుని ఎండ తీవ్రతను లెక్కచేయకుండా చీకటి పడే వరకు గుణపాలు, పలుగులు, పారలతో మట్టిని తవ్వి, మెరిసే ప్రతి రాయిని పరిశీలిస్తున్నారు. కొందరు రోజుల తరబడి అక్కడే ఉండి వంట చేసుకుంటూ వజ్రాల కోసం వెతుకుతున్నారు.

కొంతమందికి రంగురాళ్లు దొరికినట్లు చెప్పినా, అవి నిజంగా విలువైనవా అనేది నిపుణులు నిర్ధారించాల్సి ఉంది. అయినా, ఒక విలువైన వజ్రం దొరికితే జీవితం మారిపోతుందన్న ఆశతో ప్రజలు వెనక్కి తగ్గడం లేదు.

ప్రస్తుతం పరిటాల సివార్లలోని సాగు భూములు అన్వేషకులతో కిటకిటలాడుతున్నాయి. వజ్రాల వేట కొనసాగుతోంది.