ఉత్తరప్రదేశ్: భార్యకు ప్రియుడితో పెళ్లి చేసిన భర్త

సంత కబీర్ నగర్ జిల్లాలో ఓ భర్త తన భార్యను ఆమె ప్రియుడికి ఇచ్చి పెళ్లి చేశాడు. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.

ఈ దంపతులు ప్రేమించి పెళ్లి చేసుకున్నారు. వీరికి పిల్లలు కూడా ఉన్నారు. కాలక్రమేణా భార్యకు అదే ప్రాంతానికి చెందిన మరో వ్యక్తితో సాన్నిహిత్యం పెరిగింది. ఆమె భర్తను వదిలి ప్రియుడితో వెళ్లిపోయింది. తర్వాత ఇంటికి తిరిగి వచ్చినా భర్తతో కలిసి జీవించేందుకు నిరాకరించింది. ప్రియుడితోనే ఉంటానని పట్టుబట్టింది.

కుటుంబ సభ్యులు, గ్రామ పెద్దలు సమస్యను పరిష్కరించేందుకు ప్రయత్నించారు. అయినా ఫలితం లేకపోయింది. బలవంతంగా బంధాన్ని కొనసాగించడం వల్ల ఉపయోగం లేదని భావించిన భర్త, గ్రామ పెద్దల సమక్షంలో భార్యకు ఆమె ప్రియుడితో వివాహం జరిపించాడు. పెళ్లి తంతు ముగిసిన తర్వాత కొత్త జంటను ఆశీర్వదించి పంపించాడు.

ఈ వీడియోపై సోషల్ మీడియాలో మిశ్రమ స్పందనలు వచ్చాయి. కొందరు భర్త నిర్ణయాన్ని పరిణతి చెందిన నిర్ణయంగా అభివర్ణిస్తుండగా, మరికొందరు పిల్లల భవిష్యత్తు, కుటుంబ వ్యవస్థపై ప్రభావం గురించి ప్రశ్నిస్తున్నారు. తర్వాత భార్య వెళ్లిపోవడంతో పిల్లల సంరక్షణ కష్టమైందని, దాంతో భర్త ఆమెను తిరిగి రావాలని కోరినట్లు సమాచారం వచ్చింది.