హైదరాబాద్‌లో ఎలక్ట్రిక్ బైక్‌లకు బ్యాటరీ స్వాపింగ్ స్టేషన్లు ఏర్పాటు

హైదరాబాద్ నగరంలో ఎలక్ట్రిక్ ద్విచక్ర వాహనాల కోసం బ్యాటరీ స్వాపింగ్ స్టేషన్లను ఒక ప్రైవేట్ కంపెనీ ఏర్పాటు చేసింది. ఈ స్టేషన్లలో వినియోగదారులు తమ బైక్‌లోని ఖాళీ బ్యాటరీని తీసి, పూర్తిగా ఛార్జ్ అయిన బ్యాటరీని మార్చుకోవచ్చు.

హైటెక్ సిటీ, మాదాపూర్, జూబ్లీహిల్స్, బాలానగర్, అత్తాపూర్, నాగోల్ ప్రాంతాల్లో ప్రస్తుతం ఈ స్టేషన్లు అందుబాటులో ఉన్నాయి. నగరమంతా వీటిని విస్తరించాలనే డిమాండ్ వినియోగదారుల నుంచి వస్తోంది.

ఒక రోజుకు 250 రూపాయలు లేదా వారానికి 1800 రూపాయల చొప్పున స్వాపింగ్ సేవలు అందిస్తున్నారు. స్విగ్గీ, జొమాటో, రాపిడో వంటి సంస్థల్లో పనిచేసే డెలివరీ ఏజెంట్లు ఈ సదుపాయాన్ని ఎక్కువగా వినియోగిస్తున్నారు. వారు రోజూ ఎక్కువ దూరం ప్రయాణించాల్సి రావడంతో, బ్యాటరీ స్వాపింగ్ ఉపయోగకరంగా ఉంటోంది.

అయితే, డిమాండ్‌కు తగిన బ్యాటరీల సరఫరా లేకపోవడంతో వినియోగదారులు ఇబ్బందులు పడుతున్నారు. ఒక నిమిషంలో బ్యాటరీ మార్పిడి అని ప్రచారం చేసినప్పటికీ, వాస్తవంగా 2-3 గంటల వరకు నిరీక్షించాల్సిన పరిస్థితి ఉందని వినియోగదారులు చెబుతున్నారు. బ్యాటరీలు తక్కువ సంఖ్యలో ఉండటం, అన్నీ ఛార్జ్ అయి ఉండకపోవడం వల్ల ఇది జరుగుతోంది. ముందస్తు బుకింగ్ చేసుకొని డబ్బులు చెల్లించినా, బ్యాటరీ దొరకని సందర్భాలు ఉన్నాయి.

ప్రస్తుతం ఉన్న 15 బ్యాటరీల్లో కేవలం 7 బ్యాటరీలు మాత్రమే ఛార్జ్ అయ్యి అందుబాటులో ఉంటున్నాయని తెలిసింది. బ్యాటరీల సంఖ్య పెంచాలని, స్టేషన్లను మరిన్ని ప్రాంతాల్లో ఏర్పాటు చేయాలని వినియోగదారులు కోరుతున్నారు.