హైదరాబాద్ ప్రైవేట్ హాస్టళ్లకు హైడ్రా 3 నెలల గడువు

హైదరాబాద్లోని ప్రైవేట్ హాస్టల్ నిర్వాహకులకు హైడ్రా మూడు నెలల గడువు విధించింది. హాస్టల్ నడుపుతున్న భవనాలు భద్రతా ప్రమాణాలు పాటించకపోతే, జనవరి 1 నుంచి తనిఖీలు నిర్వహిస్తామని హైడ్రా కమిషనర్ ఏవి రంగనాథ్ తెలిపారు.

కమిషనర్ నేతృత్వంలో హాస్టల్ నిర్వాహకులు, భవన యజమానులతో సమీక్ష సమావేశం జరిగింది. ఈ సమావేశంలో విద్యార్థులు, ఉద్యోగుల భద్రతపై ప్రధానంగా చర్చించారు. భవన అనుమతులు, నిర్మాణ పటిష్టత, ఎమర్జెన్సీ ఎగ్జిట్, ఫైర్ సేఫ్టీ వ్యవస్థను అధికారులు పరిశీలిస్తారు.

మూడు నెలల్లోగా సురక్షితం కాని భవనాల్లో నడుస్తున్న హాస్టళ్లను సురక్షిత భవనాలకు మార్చాలని సూచించారు. నిబంధనలు ఉల్లంఘిస్తే నోటీసులతో ఆగకుండా చట్టపరమైన చర్యలు తీసుకుంటామని హెచ్చరించారు. అవసరమైతే ప్రమాదకర నిర్మాణాలను కూల్చివేస్తామని అధికారులు స్పష్టం చేశారు. ఈ తనిఖీలకు మూడు మున్సిపల్ కార్పొరేషన్లతో సమన్వయం చేసుకుంటామని రంగనాథ్ తెలిపారు.

ఇటీవల గచ్చిబౌలి అంజయ్య నగర్లో నిర్మాణంలో ఉన్న భవనం కూలి ఇద్దరు మరణించిన ఘటన నేపథ్యంలో ఈ నిర్ణయం తీసుకున్నారు. ఢిల్లీలో హాస్టల్ భవనం కూలిన ఘటన కూడా భవన భద్రతపై ప్రశ్నలు లేవనెత్తింది. జనవరి 1 నుంచి ఫీల్డ్ తనిఖీలు మొదలవుతాయి.