మైనర్లు డ్రైవింగ్ చేస్తే కఠిన చర్యలు తప్పవని హైదరాబాద్ సీపీ హెచ్చరిక
హైదరాబాద్ పోలీస్ కమిషనర్ సజ్జనార్ మైనర్లు డ్రైవింగ్ చేయడాన్ని ఎట్టి పరిస్థితుల్లోనూ సహించబోమని హెచ్చరించారు. రవీంద్ర భారతిలో హైదరాబాద్ ట్రాఫిక్ పోలీసులు నిర్వహించిన విద్యార్థుల భద్రత, ట్రాఫిక్ నిబంధనలు, డ్రగ్స్ నియంత్రణపై అవగాహన కార్యక్రమంలో ఆయన మాట్లాడారు. ఈ కార్యక్రమంలో GHMC కమిషనర్ ఆర్వి కర్ణన్, హైదరాబాద్ ట్రాఫిక్ జాయింట్ సీపీ జోయల్ డేవిస్, ప్రైవేట్ పాఠశాలల యాజమాన్యాలు పాల్గొన్నాయి.
పోలీస్ కమిషనర్ మాట్లాడుతూ, విద్యార్థులను మంచి పౌరులుగా తీర్చిదిద్దే బాధ్యత పాఠశాలల యాజమాన్యాలపై ఉందన్నారు. అకడమిక్ ర్యాంకుల కంటే, పిల్లలు క్రైమ్ లేదా డ్రగ్స్ కేసుల్లో చిక్కుకోకుండా, రోడ్డు ప్రమాదాల బారిన పడకుండా సురక్షితంగా ఉండడమే ముఖ్యమని సూచించారు. 'నా స్కూల్ పిల్లలు ఎవరూ యాక్సిడెంట్లో నష్టం పోలేదు, డ్రగ్స్ కేసులో ఇన్వాల్వ్ కాలేదు, మైనర్ డ్రైవింగ్లో ఇన్వాల్వ్ కావలేదు అని చెప్పగలిగే స్థాయికి స్కూళ్లు ఎదగాలి' అని ఆయన అన్నారు.
మైనర్ డ్రైవింగ్ కేసుల్లో నిందితులైన విద్యార్థుల జాబితాను తాము స్కూల్ యాజమాన్యాలకు పంపిస్తామని, ఆ యాజమాన్యాలపైన, తల్లిదండ్రులపైనా కేసులు నమోదు చేస్తామని సజ్జనార్ హెచ్చరించారు. రాబోయే రోజుల్లో మైనర్ డ్రైవింగ్ నిరోధానికి మరింత కఠిన చర్యలు తీసుకుంటామని తెలిపారు. పాఠశాలలకు విద్యార్థులను తీసుకొచ్చే డ్రైవర్లపై కూడా స్కూల్ యాజమాన్యాలు నిరంతరం పర్యవేక్షణ చేయాలని సూచించారు.
వార్త ఆధారాలు: పబ్లిక్ న్యూస్ బ్రాడ్కాస్ట్లు, అధికారిక అప్డేట్లు, ఉషా కిరణం ఎడిటోరియల్ ప్రమాణాలు.
సవరణల కోసం సంప్రదించండి: help@ushakiranam.com
