హైదరాబాద్ సదర్ ఉత్సవాలకు హర్యానా నుంచి 7 ముర్రా దున్నపోతులు

హైదరాబాద్‌లో దీపావళి సందర్భంగా జరిగే సదర్ ఉత్సవాల కోసం హర్యానా నుంచి ఏడు ముర్రా జాతి దున్నపోతులను తీసుకొచ్చారు. నారాయణగూడలో హరిబాబు ఆధ్వర్యంలో జరిగే సదర్ సంబరాల్లో ఈ ఏడు దున్నపోతులను ప్రదర్శించనున్నారు.

ఈ దున్నపోతులకు రోలెక్స్, ఖలీ, యువరాజ్ 2 అనే పేర్లు పెట్టారు. రోలెక్స్ వయసు సుమారు ఆరు సంవత్సరాలు. దాని ఎత్తు 5.9 అడుగులు, బరువు సుమారు 2,000 కిలోలు. ఇది ఇప్పటివరకు 12 ఛాంపియన్‌షిప్‌లు గెలిచిందని నిర్వాహకులు చెబుతున్నారు.

ఖలీ ఎత్తు 5.10 అడుగులు, బరువు 1,800 కిలోలకు పైగా ఉంది. దాని వయసు నాలుగున్నర సంవత్సరాలకు పైగా ఉంది. హర్యానాలో ఆరు ఛాంపియన్‌షిప్‌లు గెలిచిన దున్నపోతు ఇది. యువరాజ్ 2 వయసు కేవలం రెండున్నర సంవత్సరాలు. దాని ఎత్తు 5.10 అడుగులు, బరువు 1,000 కిలోల వరకు ఉంటుంది. ఇది ఇంతకుముందు ఏ పోటీలోనూ పాల్గొనలేదని, తొలిసారి సదర్ ఉత్సవాల్లోకి వస్తోందని నిర్వాహకులు తెలిపారు.

నిర్వాహకుడు అభి మాట్లాడుతూ, ప్రతి సంవత్సరం కొత్త దున్నపోతులనే తీసుకొస్తామని చెప్పారు. గత సంవత్సరం తీసుకొచ్చిన వాటిని మళ్లీ తీసుకురారు. గత ఏడాది డైరీ ఫారంకు ఒక వారంలో సుమారు 50 వేల మంది వచ్చి చూశారని, సదర్ ఉత్సవాల్లో 20 వేల మంది పాల్గొంటారని ఆయన తెలిపారు.

హర్యానా నుంచి ఈ దున్నపోతులను తీసుకొచ్చేందుకు ఏడు రోజులు పడుతుంది. రెండు వాహనాల్లో వాటిని తరలిస్తారు. పగలు విశ్రాంతి, రాత్రి ప్రయాణం చేస్తారు. ఇక్కడికి చేరుకున్నాక ఒక వారం క్వారంటైన్‌లో ఉంచుతారు. ఈ సమయంలో వాటిని ఎవరికీ చూపించరు.

దున్నపోతులకు రోజూ మూడు సార్లు స్నానం చేయిస్తారు. రోజుకోసారి ఆయిల్ మసాజ్ చేస్తారు. పడుకోవడానికి రబ్బర్ మ్యాట్‌లు ఏర్పాటు చేశారు. ఆహారంగా డ్రై పౌడర్, వెట్ పౌడర్, ఆరు రకాల మల్టీ గ్రెయిన్స్, కాటన్ కేక్, గోధుమ పొట్టు ఇస్తారు. రోజూ అయిదు డజన్ల అరటిపండ్లు, ఒక డజను ఆపిల్స్ ఇస్తారు. ఒక్కో దున్నపోతుకు రోజుకు 10 లీటర్ల పాలు ఇస్తారు. ఒక్కో దున్నపోతు నిర్వహణకు రోజుకు సుమారు ₹5,000 ఖర్చు అవుతుందని నిర్వాహకులు తెలిపారు.

సదర్ సంబరాలు అమీర్‌పేట, ఖైరతాబాద్, ఎల్‌బీ నగర్, దిల్‌సుఖ్ నగర్‌లోనూ జరుగుతాయి. నారాయణగూడ సదర్ ప్రధాన ఆకర్షణగా ఉంటుంది. ముషీరాబాద్ నుంచి నారాయణగూడ వరకు ఊరేగింపు జరుగుతుంది. బరువు ఎక్కువ ఉండడంతో ఈ దున్నపోతులు ఎక్కువ విన్యాసాలు చేయవు.