TG20 లీగ్‌లో హైదరాబాద్ e చాంపియన్స్ వరుసగా ఆరో విజయం సాధించింది

TG20 లీగ్‌లో హైదరాబాద్ ఈ చాంపియన్స్ జైత్రయాత్ర కొనసాగుతోంది. కరీంనగర్ డైమండ్స్‌పై ఏడు వికెట్ల తేడాతో ఘనవిజయం సాధించి పాయింట్ల పట్టికలో అగ్రస్థానాన్ని ఖాయం చేసుకుంది. కరీంనగర్ విధించిన 187 పరుగుల లక్ష్యాన్ని 18.1 ఓవర్లలోనే చేదించి వరుసగా ఆరో విజయం సాధించింది.

కరీంనగర్ డైమండ్స్ టాస్ గెలిచి బ్యాటింగ్ ఎంచుకోగా హైదరాబాద్ బౌలర్లు ఆరంభంలోనే గట్టి దెబ్బ తీశారు. కేవలం తొమ్మిది పరుగులకే మూడు కీలక వికెట్లు పడిపోయాయి. దేవ్ మెహతా, అజయ్ దేవగౌడ్ కట్టుదిట్టంగా బౌలింగ్ చేయగా వైష్ణవ రెడ్డి అద్భుత త్రోతో తన్మయ అగ్రవాల్‌ను రన్‌అవుట్ చేశాడు. క్లిష్ట పరిస్థితుల్లో చందన్ సహాని ఒంటరి పోరాటం చేశాడు. రాహుల్ రాదేశ్‌తో కలిసి ఇన్నింగ్స్‌ను గాడిలో పెట్టాడు. తర్వాత నారాయణ తేజతో కలిసి భారీ భాగస్వామ్యం నెలకొల్పాడు. చందన్ సహాని 55 బంతుల్లో 90 పరుగులు చేసి సెంచరీకి కేవలం 10 పరుగుల దూరంలో అవుట్ అయ్యాడు. నారాయణ తేజ 45 పరుగులు, హరీష్ అజయంగా 20 పరుగులు చేయడంతో కరీంనగర్ నిర్ణీత 20 ఓవర్లలో ఆరు వికెట్లకు 186 పరుగులు చేసింది.

లక్ష్య వేటలో హైదరాబాద్ ఈ చాంపియన్స్ కెప్టెన్ అభిరద్ రెడ్డి 26 పరుగుల వద్ద అవుట్ అయినా మరో ఓపెనర్ సాయి వికాస్ రెడ్డి దూకుడుగా ఆడాడు. కేవలం 17 బంతుల్లో 36 పరుగులు చేసి ఇన్నింగ్స్‌కు బలమైన పునాది వేశాడు. పవర్‌ప్లేలోనే ఈ చాంపియన్స్ 66 పరుగులు చేసి విజయానికి బాటలు వేసింది. వైష్ణవ రెడ్డి ప్రశాంతంగా ఆడుతూ టోర్నీలో తన తొలి అర్ధసెంచరీ పూర్తి చేశాడు. గణేష్ గడుగు 21 పరుగులతో సహకరించాడు. ప్రణవ్ వర్మ 15వ ఓవర్లో వరుసగా మూడు ఫోర్లు, ఒక భారీ సిక్సర్ బాది ప్రత్యర్థి బౌలర్లపై విరుచుకుపడ్డాడు. చివరకు వైష్ణవ రెడ్డి 42 బంతుల్లో 65 పరుగులతో అజయంగా నిలిచి జట్టుకు వరుసగా ఆరో విజయాన్ని అందించాడు.

మ్యాచ్‌లో వేగవంతమైన ఇన్నింగ్స్ ఆడిన సాయి వికాస్ రెడ్డికి సూపర్ స్ట్రైకర్ ఆఫ్ ది మ్యాచ్, బౌలింగ్‌తో పాటు బ్యాటింగ్‌లోనూ మ్యాచ్ మలుపు తిప్పిన ప్రణవ్ వర్మకు గేమ్ చేంజర్ ఆఫ్ ది మ్యాచ్, అర్ధసెంచరీతో జట్టును విజయతీరాలకు చేర్చిన వైష్ణవ రెడ్డికి ప్లేయర్ ఆఫ్ ది మ్యాచ్ అవార్డులు దక్కాయి. హైదరాబాద్ ఈ చాంపియన్స్ పాయింట్ల పట్టికలో అగ్రస్థానాన్ని ఖాయం చేసుకొని క్వాలిఫయర్ వన్‌లోకి దూసుకెళ్ళింది.