హైదరాబాద్‌లో గణేష్ నిమజ్జనం ప్రశాంతంగా ముగిసినట్లు సీపీ సజ్జనార్

హైదరాబాద్‌లో గణేష్ విగ్రహాల నిమజ్జనం ప్రశాంతంగా ముగిసిందని సిటీ పోలీస్ కమిషనర్ సజ్జనార్ తెలిపారు. ఖైరతాబాద్‌లో దాదాపు 30 లక్షల మంది, బాలాపూర్‌లో దాదాపు 15 లక్షల మంది గణేష్ మండపాలను సందర్శించినట్లు ఆయన చెప్పారు.

ఆయన ప్రజలకు, నిర్వాహకులకు ధన్యవాదాలు తెలిపారు. నాలుగు పోలీస్ కమిషనరేట్లతో పాటు ఇతర జిల్లాలు, రాష్ట్రాలు, విదేశాల నుంచి కూడా ప్రజలు వచ్చినట్లు వివరించారు. తెలంగాణ ప్రభుత్వం, GHMC, HYDRAA, R&B, TGS PDCL, DMHO, TSRTC అధికారులు సహకరించారని చెప్పారు.

బందోబస్తు కోసం హైదరాబాద్ సిటీ పోలీస్‌లోని 20,000 మందితో పాటు బయటి నుంచి 8,000 మంది సిబ్బందిని రప్పించినట్లు తెలిపారు. Greyhounds, Octopus, TGSP బృందాలు కూడా పాల్గొన్నాయని ఆయన చెప్పారు. మీడియా, పోలీసు అధికారులు కష్టపడ్డారని అభినందించారు.

కొన్ని చోట్ల చిన్నచిన్న అసౌకర్యాలు జరిగాయని సజ్జనార్ తెలిపారు. వాటిని సరిదిద్దుకుంటామని చెప్పారు. పేపర్ ష్రెడ్‌ మిషన్ల వల్ల నగరంలో పేపర్ చెత్త ఎక్కువైందని ఆయన పేర్కొన్నారు. వచ్చేసారి వాటిని నిషేధించే అంశాన్ని ప్రభుత్వం దృష్టికి తీసుకెళ్తామని తెలిపారు.

రాబోయే 48 గంటలు ట్యాంక్‌బండ్, నెక్లెస్ రోడ్, ఎన్‌టీఆర్ మార్గ్‌లపై క్రేన్ల తొలగింపుకు కీలకమని ఆయన పేర్కొన్నారు. ఈ అనుభవంతో వచ్చే ఏడాది మరింత మెరుగైన బందోబస్తు చేయనున్నట్లు వివరించారు.